Трамп бутун дунё кутган хабарни маълум қилди

АҚШ Президенти Дональд Трамп Эрон билан давом этаётган уруш жорий йилнинг 3 ноябрь куни бўлиб ўтадиган АҚШ оралиқ сайловларидан кейин тугашини айтди. Бу ҳақда у кеча, 9 сентябрь куни Вашингтон яқинидаги Joint Base Andrews ҳарбий базасида журналистларга маълум қилди.

Трампнинг сўзларига кўра, Эрон урушга бундан ортиқ бардош бера олмайди. У Теҳрон сайловларга таъсир ўтказишга уриниш учун “умидсиз аҳволга тушиб қолганини” билдирган.

“Менимча, уруш сайловдан кейин тугайди, чунки улар энди бундан ортиқ бардош бера олмайди. Улар сайловга таъсир ўтказишга уриниш учун умидсиз аҳволда”, деган Трамп.

Шунингдек, АҚШ Президенти Эрон билан музокаралар ўтказиш эҳтимолини ҳам бутунлай истисно қилмаган. Унинг сўзларига кўра, музокаралар бўлиши мумкин, бироқ ҳозирда Вашингтон бундай имкониятни кўриб чиқмаяпти.

“Музокара бўлиши мумкин, аммо ҳозир биз кўриб чиқаётган масала бу эмас”, деган у.

Трамп, шунингдек, АҚШнинг Эронга қарши операциялари давом этишига ишора қилган.

“Бундан ҳам кўпроғини кўрасиз”, деди АҚШ Президенти ҳужумлар ҳақида.

Қайд этилишича, Эрон АҚШ томонидан 5 та Эрон нефть танкерига зарба берилганидан сўнг, Ҳормуз бўғози яқинида 10 та кемани нишонга олганини маълум қилган. Минтақадаги кескинликнинг кучайиши фонида Brent нефтининг бир баррели нархи 100 доллардан ошган.

Трамп урушнинг тугаши нефть нархларининг ҳам пасайишига олиб келишини айтган. У нархлар АҚШдаги оралиқ сайловлардан кейин тезда тушишини кутаётганини билдирган.

Ушбу баёнотлар Эрон билан уруш еттинчи ойга кирган ва Ҳормуз бўғози атрофидаги ўзаро ҳужумлар яна кучайган бир пайтда янграган.

Эслатиб ўтамиз, аввалроқ АҚШ Президенти Дональд Трамп жорий йилнинг ноябрь ойидаги Конгресс сайловларида республикачилар назоратни сақлаб қолса, ҳар бир катта ёшли америкаликка 5 минг доллардан “Трамп дивиденди” тўлашни ваъда қилган эди.