Тожикистондан қарийб 14 кг “опий” олиб ўтган шахслар ушланди

Сирдарё ва Жиззах вилоятларида ўтказилган тезкор тадбирларда Тожикистондан олиб келинган 13 килограммдан ортиқ “опий” моддасининг ноқонуний айланишига чек қўйилди. Бу ҳақда Давлат хавфсизлик хизмати хабар қилди.

Қайд этилишича, ДХХнинг Тошкент вилояти бўйича бошқармаси томонидан гиёҳвандлик воситаларининг ноқонуний айланмасига қарши курашиш доирасида тезкор тадбирлар ўтказилган.

Унда олдиндан тезкор кузатувга олинган Тошкент шаҳрида яшовчи, 1985 йилда туғилган, муқаддам судланган шахснинг Сирдарё туманидаги вақтинчалик яшаш хонадонлари холислар иштирокида кўздан кечирилган.

Шунда у ерда 1983 йилда туғилган Тожикистон фуқароси ва Қашқадарё вилоятида яшовчи, 1962 йилда туғилган, муқаддам гиёҳвандлик воситалари савдоси билан боғлиқ жиноят учун судланган яна бир фуқаро ҳам борлиги аниқланган.

Суриштирувлар давомида мазкур уч нафар шахс қўшни Тожикистон Республикасидаги наркокурьерлар томонидан Жиззах вилоятининг Янгиобод тумани ҳудудидаги яширин жойга қолдирилган наркотик моддаларни олиб, уларни сотиш ва тарқатиш орқали катта миқдорда моддий бойлик орттириш мақсадида ўзаро жиноий тил бириктиргани аниқланган.

Шунингдек, тезкор тадбир давом эттирилиб, яширин жойдан умумий оғирлиги 13 килограмм 653 грамм “опий” моддаси олиниб, процессуал тартибда ҳужжатлаштирилган. Билдирилишича, ҳозирда ушбу шахсларга нисбатан жиноят иши қўзғатилиб, тергов ҳаракатлари олиб борилмоқда.

Эслатиб ўтамиз, аввалроқ Наманган вилоятида гиёҳвандлик воситаларининг ноқонуний айланмасига қарши ўтказилган тезкор тадбир давомида қарийб 39 грамм гашиш сақлаган ва сотишга уринган шахс ушланган эди.