Тошкентда “закладчик” бўлиб ишлаган мактаб ўқувчиси ушланди (видео)

Россиядан Ўзбекистонга синтетик гиёҳвандлик воситаларини контрабанда йўли билан олиб киришни режалаштирган трансмиллий жиноий тармоққа алоқадор бир гуруҳ шахслар қўлга олинди. Улардан катта миқдорда альфа-PVP ва бошқа гиёҳвандлик воситалари ашёвий далил сифатида олинган. Бу ҳақда Ички ишлар вазирлиги хабар берди.

Қайд этилишича, ўтказилган тезкор тадбир давомида 2009 йилда туғилган, мактаб ўқувчиси бўлган вояга етмаган шахс қўлга олинган. Маълум бўлишича, у интернет-наркодўконда “омборчи” вазифасини бажариб келган ва Россиядан контрабанда йўли билан олиб кирилган гиёҳвандлик воситаларини Yandex хизмати орқали қабул қилган.

Мазкур 17 ёшли бола Чилонзор туманида ҳаракатланаётган вақтида ушланган. Унинг ёнидаги арра ускунаси ичига яширилган 180 грамм альфа-PVP аниқланиб, ашёвий далил сифатида расмийлаштирилган.

Тезкор тадбир давомида вояга етмаган шахснинг 2 нафар шериги ҳам Чилонзор туманида гиёҳвандлик воситаларини яширилган жойдан олаётган вақтда қўлга олинган.

Шунингдек, уларнинг Telegram аккаунтлари текширилганда, олдинроқ олти жойга “закладка” усулида гашиш мойи яширилгани аниқланган ва ушбу гиёҳвандлик воситалари ҳам ашёвий далил сифатида олинган.

Тергов-қидирув тадбирлари давомида 1992 йилда туғилган, интернет-наркодўконда “омборчи” бўлиб ишлаган яна бир шахс ҳам қўлга олинган. У гиёҳвандлик воситаларини Yandex хизмати орқали қабул қилиб, яшаш хонадонига олиб бораётган вақтда ушланган.

Мазкур шахснинг уйидаги перфоратор ичида яширилган 500 грамм альфа-PVP, шунингдек, бошқа хонадонда яширилган яна 50 грамм альфа-PVP аниқланган.

Кейинги тезкор тадбирлар Юнусобод туманида давом эттирилиб, 1999 йилда туғилган, аввал Жиноят кодексининг 169-моддаси (Ўғрилик) 3-қисми билан судланган яна бир шахс қўлга олинган. У Telegram’даги наркодўконда “омборчи” вазифасини бажаргани ва куратор кўрсатмаси билан яширилган жойдан 500 грамм альфа-PVP’ни олган вақтида қўлга олинган.

Билдирилишича, мазкур ҳолатлар юзасидан жиноий ҳаракат содир этган шахсларга нисбатан Жиноят кодексининг 273-моддаси (Гиёҳвандлик воситаларини, психотроп моддаларни ёки уларнинг аналогларини ўтказиш мақсадини кўзлаб қонунга хилоф равишда тайёрлаш, қайта ишлаш, олиш, сақлаш ва бошқа ҳаракатлар қилиш, шунингдек уларни қонунга хилоф равишда ўтказиш) 6-қисми “а” банди билан жиноят иши қўзғатилиб, қамоқ эҳтиёт чораси қўлланган.

Эслатиб ўтамиз, аввалроқ Бухорода 843 миллион сўмлик “спайс” мусодара қилингани ҳақида хабар берилган эди.