Тошкентда омборхона ёниб кетди (видео)

Бугун, 28 апрель куни Тошкент шаҳар Миробод туманида жойлашган қурилиш маҳсулотлари омборхонасида ёнғин чиқди. Бу ҳақда Фавқулодда вазиятлар вазирлиги хабар берди.

Қайд этилишича, соат 07:00 да Миробод тумани “Абдурауф Фитрат” МФЙ Г.Алиев кўчасида жойлашган қурилиш маҳсулотлари сақланаётган омборхоналарнинг бирида ёнғин содир бўлгани тўғрисида ФВБга хабар қилинган. Шунга кўра, ёнғин-қутқарув экипажлари соат 07:02 да ҳодиса жойига етиб бориб, ёнғин соат 08:33 да ўчирилган.

Билдирилишича, ёнғин оқибатида омборхонанинг тахминан 500 квадрат метр майдонда ички ва том қисми ёниб зарарланган. Ёнғинни бартараф этишга 12 та ёнғин-қутқарув экипажи жалб этилган. Ҳозирда ёнғин сабаби ва моддий зарар миқдори аниқланмоқда. Ёнғин оқибатида тан-жароҳати олганлар йўқ. Воқеа жойига Тошкент шаҳар ва туман ФВБ раҳбар ходимлари чиққан.

Эслатиб ўтамиз, аввалроқ Тошкент вилояти Зангиота тумани “Олим полвон” маҳалласи Камолиддин Беҳзод кўчасида жойлашган гилам дўконида ёнғин содир бўлганди. Ҳодиса оқибатида тан жароҳати олган ва ҳалок бўлганлар кузатилмаган.