Тошкентда “куратор” 10 кг наркотик билан ушланди (видео)

Тошкент шаҳрида интернет орқали фаолият юритган наркодўконда қарийб 10 килограмм гиёҳвандлик воситалари аниқланиб, мусодара қилинди. Бу ҳақда Ички ишлар вазирлиги хабар берди.

Маълум қилинишича, республика ҳудудида ўтказилаётган “Қорадори-2026” кенг қамровли тезкор-профилактик тадбирлари доирасида интернет наркодўконида администратор ва куратор сифатида фаолият юритган, 1989 йилда Тошкент шаҳрида туғилган фуқаро қўлга олинган. У аввал Жиноят кодексининг 164-моддаси (босқинчилик) ва 278-моддаси (қимор ва таваккалчиликка асосланган бошқа ўйинларни ташкил этиш ҳамда ўтказиш) билан судланган.

Гумонланувчига тегишли автомашина ва яшаш хонадони кўздан кечирилганда 9 килограмм 330 грамм “гашиш” ҳамда 545 грамм “метамфетамин” сақланаётгани аниқланган. ИИВ маълумотларига кўра, мусодара қилинган гиёҳвандлик воситалари жами 64 817 дозага тенг.

Мазкур ҳолат юзасидан жиноий гуруҳга нисбатан Жиноят кодексининг 273-моддаси (гиёҳвандлик воситаларини, психотроп моддаларни ёки уларнинг аналогларини ўтказиш мақсадини кўзлаб қонунга хилоф равишда тайёрлаш, қайта ишлаш, олиш, сақлаш ва бошқа ҳаракатлар қилиш, шунингдек уларни қонунга хилоф равишда ўтказиш) 5-қисми билан жиноят иши қўзғатилган. Ушбу турдаги жиноий ҳаракатларни содир этган шахсларга 20 йилгача озодликдан маҳрум қилиш жазоси белгиланган.

Эслатиб ўтамиз, аввалроқ Сирдарё ва Жиззах вилоятларида ўтказилган тезкор тадбирларда Тожикистондан олиб келинган 13 килограммдан ортиқ “опий” моддасининг ноқонуний айланишига чек қўйилгани ҳақида хабар берилган эди.