Тошкент аэропортида 1,3 млрд сўмлик тиллани юклари орасига яширган шахс ушланди

“Тошкент-АЭРО” ихтисослаштирилган божхона комплексида қиймати 1,2 миллиард сўмдан ортиқ заргарлик буюмларини яширинча олиб ўтиш ҳолати аниқланди. Бу ҳақда божхона комплекси матбуот хизмати хабар берди.

Қайд этилишича, “Дубай–Тошкент” йўналиши орқали Ўзбекистонга кириб келган фуқаронинг юклари божхона назоратидан ўтказилганда, декларацияда кўрсатилмаган заргарлик буюмлари ва олтин қуймалар аниқланган. Хусусан, юклар орасидан соф оғирлиги 921,37 грамм бўлган 141 дона заргарлик буюмлари ҳамда 3 дона олтин қуймаси топилган.

Экспертиза натижаларига кўра, аниқланган заргарлик буюмлари ва олтин қуймаларнинг умумий қиймати 1 миллиард 293 миллион сўмни ташкил этиши белгиланган. Бундан ташқари, фуқаронинг юклари орасидан 120 қути акциз маркалари бўлмаган тамаки ҳамда 90 дона никотинли снюс маҳсулотлари ҳам аниқланган.

Билдирилишича, ҳозирда жиноят иши қўзғатилган, тергов ҳаракатлари олиб борилмоқда.

Эслатиб ўтамиз, аввалроқ Наманган аэропортида 5 нафар фуқаро 1,1 млрд сўмлик олтинни яширинча Ҳиндистонга олиб чиқишга урингани аниқланганди.