Тошкент ҳайвонот боғида шер ва жайраларга тош отган эркак жазоланди (видео)

Тошкент ҳайвонот боғида шер ва жайраларга тош отган эркак 2 млн 884 минг сўм миқдорда жаримага тортилди. Бу ҳақда ҳайвонот боғининг матбуот хизмати хабар берди.

Ички ишлар органлари профилактика инспектори қарорига кўра, қоидабузарга 2 млн 884 минг сўм миқдорида жарима солинган. Шунингдек, у қилган иши учун узр сўраган.

Маълум бўлишича, ҳодиса жорий йилнинг 13 август куни содир бўлган. Ташриф буюрувчилардан бири шер ва жайраларга тош ота бошлаган. Жайралар волйери очиқ бўлгани сабабли, ташланган тошлар ҳайвонларга ҳам теккан.

Ҳайвонот боғи маъмуриятига кўра, эркакнинг хатти-ҳаракатини унинг фарзанди ҳам такрорлаган ва у ҳам ҳайвонларга тош ота бошлаган. Бундан ташқари, ташриф буюрувчи тошлар ҳайвонларга текканидан сўнг қарсак чалиб, бу ҳолатдан мамнун бўлганини намоён этган.

Шундан сўнг, видеокузатув камералари ёзувлари орқали қоидабузарни аниқлаш ишлари олиб борилган ва унга нисбатан тегишли чоралар кўрилган.

Эслатиб ўтамиз, аввалроқ кўпроқ кузатувчи йиғиш учун мушук боласини баланд тўсиқ орқали отган йигит жазоланганди.