Тиллага “кўмилган” келин: блогерларнинг тўйи катта текширувга сабаб бўлди

Туркиянинг Ван шаҳрида ижтимоий тармоқларда машҳур бўлган мода дизайнери ва тадбиркор Чағли Ўз ҳамда “Ванли Қора Ҳайдар” лақаби билан танилган блогер Меҳмет Фотиҳ Танчаланнинг тўйида уларга тақилган катта миқдордаги олтин ва пуллар текширувга сабаб бўлди. Келиннинг ўзига 52 килограмм олтин, куёвга эса 44 миллион турк лираси тақилгани айтилмоқда. Бу ҳақда “Haberler” хабар берди.

Маълум қилинишича, тўй жорий йилнинг 6 сентябрь куни Ван шаҳрининг Тушба туманида бўлиб ўтган. Маросимда келиннинг қўлига кўплаб олтин билагузуклар тақилган. Билагузуклар қўлига сиғмай қолгач, қолганлари қалин занжирга тизилиб, бўйнига осилган.

Тўйда тақилган олтин, заргарлик буюмлари, хорижий валюта ва турк лираси Туркия ҳуқуқ-тартибот идоралари эътиборига тушган. Шунингдек, келин-куёвдаги олтин ва пуллар уларнинг даромадига мос келиши ёки келмаслиги ҳам текширилмоқда.

Бундан ташқари, олтинларнинг қаердан келгани ҳам Туркия ҳуқуқ-тартибот идоралари эътиборидан четда қолмаган. Бу иш билан Туркиянинг Молиявий жиноятларни тергов қилиш кенгаши – MASAK шуғулланмоқда.

Меҳмет Фотиҳ Танчалан эса бошқа иш бўйича ҳам қўлга олинган. Унга давлат ва давлат ташкилотларини ҳақорат қилиш ҳамда жиноятдан олинган мол-мулкни легаллаштириш билан боғлиқ айбловлар қўйилган. У суд қарори билан ҳибсга олинган. Танчалан эса айбловларни рад этган. Унинг айтишича, тўй ва унаштирув харажатларининг катта қисми реклама ва ҳомийлик келишувлари ҳисобидан қопланган. Тақилган олтинларнинг бир қисми эса заргарлардан вақтинча олинган.

Эслатиб ўтамиз, аввалроқ Туркиядаги ўз тўйида тилла ўғирлаб кетишга оид воқеа содир бўлган эди. Унда ўзбекистонлик келин асосий фигурантга айланганди. Яъни ўзбекистонлик М.Б. га тўйидан сўнг уйда қолган тилла ва зийнат буюмлари билан бирга ғойиб бўлди, деган айблов қўйилган. Бироқ у ўз ихтиёри билан маҳаллий полиция бўлимига бориб, ҳолат юзасидан кўрсатма берган. Унга кўра, тўйда тақилган тилла буюмларни онаси билан биргаликда қайнотасига топширган. Шунингдек, қайнотаси кейинчалик ушбу тиллаларни кредит ва бошқа қарзларини тўлаш учун сотганини ўзаро ёзишмаларда қайд этган.