Тадқиқотлар руслар ва украинлар бир халқ эканини кўрсатяпти – Путин

Охирги генетик тадқиқотлар руслар ва украинлар бир халқ эканини кўрсатяпти. Бу ҳақда Россия Президенти Владимир Путин ВГТРК мухбири Павел Зарубинга берган интервьюсида гапирди.

Путин Зарубинга берган интервьюсида АҚШ Президенти Дональд Трампнинг махсус вакили Стив Уиткофф билан ўтказилган музокараларга илк бор изоҳ берган ва Россиянинг позициясини билдирган.

Путиннинг сўзларига кўра, Россия АҚШ вакиллари билан уч томонлама мулоқотларни қайта тиклашга тайёрлиги бўйича келишиб олган. 

“Ушбу музокараларнинг мақсади ҳарбий ҳаракатларни вақтинча тўхтатиш эмас, балки тинчлик келишувларининг якуний вариантига эришилгандан сўнг Украина ва Россия хавфсизлигини таъминлаш масаласини муҳокама қилишдан иборат бўлади”, дейди у.

Зарубин, шунингдек, Путиндан “Fox News”га берган интервьюсида фронт чизиғи бўйлаб вазиятни музлатиб қўйишга ҳамда Украина ҳудудининг 75 фоизини сақлаб қолишга тайёрлигини айтган Зеленскийнинг баёноти ҳақида сўраган. Путин бу “уларнинг ҳудуди эмас, балки тарихий Россиянинг ҳудуди”, деб жавоб берган.

Бундан ташқари, Путин Россия эмас, айнан Украина урушни хоҳлаётганини айтган.

“Биз Украина билан урушишни хоҳламаймиз. Агар бугунги Украина раҳбарияти урушишни истаса, майли урушсин, лекин нега улар ҳамма бунинг учун товон тўлаши ва уларга қурол етказиб бериши керак деб ҳисоблайди? Биз ҳозир ҳам келишишга ва ушбу оғир вазиятдан чиқиш йўлларини излашга тайёрмиз. Бу бизга жуда яқин бўлган халқ. Охирги генетик тадқиқотлар шуни кўрсатмоқдаки, руслар ва украинлар бир халқдир”, дейди Путин.

Бироқ у қайси “охирги генетик тадқиқотлар”ни назарда тутаётгани номаълум.

Эслатиб ўтамиз, аввалроқ Владимир Путин АҚШ воситачилигида Украина билан уч томонлама тинчлик музокараларини келаси ой қайта бошлашга рози бўлгани ҳақида хабар берилган эди. Музокаралар жорий йилнинг 10 ноябрида ёки ундан кейин Бирлашган Араб Амирликларининг Абу-Даби шаҳрида ўтказилиши мумкин.