Астрономлар илк бор яшил рангли юлдузни аниқлади

Астрономлар WD J1330+6435 номли оқ митти юлдузни яшил рангда кўринадиган илк юлдуз сифатида аниқлади. Бу ҳақдаги тадқиқот натижалари “RAS Techniques and Instruments” илмий журналида эълон қилинди.

Қайд этилишича, мазкур юлдуз Ердан 284 ёруғлик йили узоқликда жойлашган. Унинг ҳарорати тахминан 4 минг даражани ташкил этади. Бу Қуёш ҳароратидан анча паст бўлиб, одатий юлдуз бундай шароитда қизғиш-тўқ сариқ рангда кўриниши мумкин.

Олимлар юлдузнинг рангини бевосита суратга олиш орқали эмас, балки ундан келаётган кўринадиган ёруғликнинг турли диапазонларини ўлчаш ва инсон кўзи рангларни қандай қабул қилишини ҳисобга олувчи рақамли моделлар ёрдамида аниқлаган. Чунки оқ миттилар жуда кичик бўлгани сабабли, узоқ масофадан телескопларда ёруғ нуқта кўринишида намоён бўлади.

Тадқиқотга кўра, WD J1330+6435 атмосферасида натрий, кальций ва литий каби элементларнинг излари мавжуд. Натрий тўқ сариқ рангдаги, кальций эса бинафша рангдаги ёруғликнинг бир қисмини ютади. Натижада юлдуздан келаётган ёруғлик инсон кўзига яшил, деярли оч яшил рангда кўриниши мумкин.

Олимларнинг билдиришича, илгари яшил рангда кўринадиган бошқа юлдуз ҳақида ишончли илмий маълумотлар мавжуд бўлмаган. Шу сабабли WD J1330+6435 ушбу хусусияти билан алоҳида аҳамият касб этади.

Оқ миттилар – Қуёшга ўхшаш юлдузлар эволюциясининг сўнгги босқичида ҳосил бўладиган, жуда зич осмон жисмларидир. Тадқиқотда уларнинг ранги ҳар доим ҳам оқ бўлмаслиги, атмосферасидаги кимёвий элементлар ва ҳароратига қараб пушти, бинафша, сариқ, мовий ёки яшил тусда кўриниши мумкинлиги қайд этилган.

Маълумот учун, ўрганилган оқ миттиларнинг тахминан 3,4 фоизидагина оқ рангдан сезиларли даражада фарқ қиладиган ноодатий ранглар кузатилган.

Эслатиб ўтамиз, аввалроқ Немис олимлари Сатурннинг Энцелад йўлдошидаги муз ости океанида айрим микроорганизмлар яшаши мумкинлигини лаборатория тажрибасида кўрсатгани ҳақида хабар берилган эди.