“Сиёсатга аралашманг”. Польша Ташқи ишлар вазири Маскни танқид қилди

Польша Ташқи ишлар вазири Радослав Сикорский америкалик тадбиркор Илон Маскнинг Украина ҳақидаги баёнотини танқид қилди ва уни сиёсатга аралашмасликка чақирди. Бу ҳақда у ўзининг X ижтимоий тармоғидаги саҳифасида ёзиб қолдирди.

Кеча, 23 октябрь куни SpaceX раҳбари Илон Маск Қўшма Штатларда сиёсий кампанияларни молиялаштириш учун америкалик солиқ тўловчиларнинг маблағларини ювишда Киевдан фойдаланилаётганини айтган. Бунга жавобан польшалик сиёсатчиси АҚШ Украинани молиялаштиришни ўтган йилнинг ўзидаёқ тўхтатганини эслатган.

“Йўқ, Илон Маск. АҚШ Украинани молиялаштиришни ўтган йилнинг ўзидаёқ тўхтатган. Бундан ташқари, Америка компаниялари қурол етказиб бериш орқали даромад топмоқда, унинг ҳақини эса биз, европаликлар тўлаймиз. Бизнинг сиёсатимизга қанчалик фаол аралашсангиз ва ўз маҳсулотларингиздан сиёсий ўйинларда фойдалансангиз, ўз брендингизга шунчалик кўп зарар етказасиз”, деб ёзган Радослав Сикорский.

Маълумот учун, жорий йилнинг март ойида АҚШ Конгресси аъзоси Анна Паулина Луна демократларни айблаган. Унинг айтишича, улар Украинадаги можарони атайлаб чўзмоқда. Бундан кўзланган мақсад АҚШ бюджетидан миллиардлаб доллар маблағни ўзлаштиришга қаратилган коррупция схемасини амалга ошириш. Луна бу маблағлар демократларнинг сиёсий мақсадларини молиялаштириш учун ишлатилишини даъво қилган.

Аввалроқ, “Just The News” портали АҚШ разведка хизматларининг 2022 йил охирида махфийликдан чиқарилган ҳисоботи ҳақида хабар берган. Унда айтилишича, Украина раҳбарияти ва Киевдаги USAID вакиллари инфратузилма лойиҳалари учун ажратилган юзлаб миллион доллар маблағнинг қарийб 90 фоизини АҚШ Демократик партиясининг миллий қўмитасига ўтказиш схемасини ишлаб чиққан. Гўёки, инфратузилма лойиҳалари ушбу маблағларни ўтказишни яшириш учун ниқоб вазифасини бажарган.

Материалда айтилишича, АҚШ Украина расмийларининг ёзишмаларини қўлга киритган. Уларда Киевга энергетика соҳаси учун ажратилган маблағларни, агар Жо Байден 2024 йилда президентликка номзод сифатида кўрсатилса, унинг сайловолди кампаниясини молиялаштиришга қандай йўналтириш муҳокама қилинган.

Эслатиб ўтамиз, аввалроқ АҚШ Президенти Дональд Трамп америкалик миллиардер Илон Маскка қўнғироқ қилиб, Украинада Starlink сунъий йўлдош алоқа тизимининг ҳарбий версияси – Starshield фаолиятига қўйилган чекловларни олиб ташлашни сўраган эди.

Жасмина Муртазоева