Сильвестр Сталлоне Трамп таклиф қилган “курси”га ўтирмади

Америкалик актёр Сильвестр Сталлоне АҚШ Президенти Дональд Трампнинг Голливуддаги киноиндустрия бўйича махсус элчиси бўлиш таклифини рад этди. Бу ҳақда Сталлоненинг ўзи маълум қилди.

Санъаткорнинг сўзларига кўра, у бу тайинлов ҳақида телевизион янгиликлар орқали, ўз исмини Мел Гибсон ва Жон Войт билан бир рўйхатда кўргач хабар топган. Актёрнинг айтишича, агар ундан олдиндан сўрашганида, у дарҳол бу ғояни амалга ошириб бўлмайдиган деб атаган бўлар эди.

Сталлоне ўз рад жавобини ушбу лавозимдаги вазифаларни бажариш деярли имконсизлиги билан изоҳлаган. Унинг фикрича, киностудиялар алоҳида феодал давлатлардек фаолият юритади ва ҳеч бир инсон келиб, йирик компаниялар раҳбариятига бизнесни қандай юритиш кераклигини кўрсата олмайди. Актёр Голливуднинг корпоратив сектори молиявий ва ишлаб чиқариш масалаларида унинг маслаҳатларига қулоқ солмаслигини алоҳида қайд этган. Оқибатда Сталлоне “раҳмат ва чао” деб рад жавобини берган.

Трампнинг ташаббусига кўра, актёрлар кино ишлаб чиқаришни бошқа мамлакатлардан АҚШга қайтаришга ёрдам бериши керак эди. Бироқ бу лавозим расмий давлат пости ҳисобланмасди ва маслаҳатчилик хусусиятига эга эди. Сталлонедан фарқли ўлароқ, унинг ҳамкасби Жон Войт администрация билан ҳамкорликни давом эттирган ва Америка киноиндустриясини қўллаб-қувватлаш режасини тақдим этган. Сталлоненинг ўзи эса ҳозирда машҳур “Талса қироли” жиноий сериалининг тўртинчи мавсумида суратга тушишга эътиборини қаратган.

Маълумот учун, Сильвестр Сталлоне 1946 йил 6 июль куни АҚШнинг Нью-Йорк шаҳрида туғилган машҳур актёр, режиссёр, сценарист ва продюсер. У жаҳон кинематографиясида, айниқса, жангари жанрининг энг ёрқин афсоналаридан бири ҳисобланади. Сталлонени бутун дунёга машҳур қилган энг йирик лойиҳаларидан бири бу – иродали боксчи Рокки Бальбоа ҳақидаги фильмлар серияси. 1976 йилда экранларга чиққан биринчи “Рокки” фильми сценарийсини Сталлоненинг ўзи ёзган ва бош ролни ижро этган бўлиб, ушбу киноасар кейинчалик “Оскар” мукофотини қўлга киритган.

Шунингдек, актёр Вьетнам уруши фахрийси ва енгилмас жангчи Жон Рэмбо ҳақидаги машҳур франшиза орқали ҳам томошабинлар қалбидан жой олган. Кейинчалик у Голливуднинг энг таниқли жангари фильм актёрларини бир жойга тўплаган “Уддалаб бўлмас” лойиҳасига ҳамда сўнгги йилларда суратга олинаётган, катта оммабопликка эришган “Талса қироли” (Tulsa King) жиноий драма сериалига бошчилик қилган. Ўз фаолияти давомида “Оскар” ва “Олтин глобус” мукофотларига номзод бўлган Сталлоне кинематография ривожига қўшган ҳиссаси учун кўплаб халқаро мукофотлар соҳибига айланган. У нафақат кино оламида, балки турли жамоатчилик ва маданий лойиҳаларда ҳам фаол иштирок этиб келади.