Швеция Ўзбекистонга янги элчисини тайинлади

Кеча, 10 сентябрь куни Ўзбекистон Ташқи ишлар вазири Бахтиёр Саидов Швециянинг Ўзбекистондаги Фавқулодда ва мухтор элчиси этиб тайинланган Мартин Розен жанобларидан ишонч ёрлиқларини қабул қилди. Бу ҳақда Саидов ўзининг Telegram-каналида ёзиб қолдирди.

Қайд этилишича, сўнгги йилларда Ўзбекистон – Швеция муносабатлари сезиларли даражада фаоллашмоқда.

Шунингдек, суҳбат давомида савдо-иқтисодий ва инвестициявий ҳамкорликни кенгайтириш ҳамда ишбилармон доиралар ўртасидаги тўғридан-тўғри алоқаларни рағбатлантириш муҳимлиги таъкидланган.

“Элчи жанобларига янги вазифасида муваффақиятлар тилаб, ўзаро муносабатларни янги босқичга олиб чиқиш учун биргаликда ишлашга тайёр эканимизни тасдиқладик”, дейилади хабарда.

Маълумот учун, Ўзбекистон ва Швеция ўртасида дипломатик муносабатлар 1992 йил 8 апрелда ўрнатилган. Мартин Розенгача Швециянинг Ўзбекистондаги Фавқулодда ва мухтор элчиси Томас Данестад бўлиб, у 2022–2026 йилларда ушбу лавозимда фаолият юритган. 

Шунингдек, Швециянинг Тошкентда доимий резидент элчихонаси биноси мавжуд эмас. Шу сабабли, Швеция Ташқи ишлар вазирлигининг махсус тизимига кўра, элчи ўз вазифаларини Стокголмдан туриб бажаради ва муносабатларни мустаҳкамлаш учун Ўзбекистонга мунтазам равишда дипломатик сафарлар уюштириб туради.

Эслатиб ўтамиз, аввалроқ Ўзбекистон Ташқи ишлар вазири Бахтиёр Саидов Бельгиянинг Ўзбекистондаги Фавқулодда ва мухтор элчиси этиб тайинланган Матиас Кендедан ишонч ёрлиқлари нусхаларини қабул қилган эди.