Саратондан вафот этган аёл дафн маросими куни тирилди

Хитойда саратон ва бош мия тромбозидан вафот этган 70 ёшли аёл ўлимидан бир куни кейин совуткичли тобутда ётган ҳолда ҳушига келди. Бу ҳақда “The Paper” нашри хабар берди.

“Оила аъзолари ўлимни қайд этгач, кекса аёл совуткичли тобутга жойлаштирилган. Кутилмаганда, 9 сентябрь куни кечқурун аёлнинг келини тобут ичидан келаётган кучсиз инграшни эшитиб қолган”, дейилади нашр хабарида.

Шундан сўнг, аёл зудлик билан тобутдан олинган. Жорий йил 11 сентябрга келиб оиланинг барча яқинлари хонадонга йиғилганида, пенсионер аёл қисман ҳушига қайтган ва кўзларини очган. Шунга қарамай, унинг аҳволи оғирлигича қолган: у мустақил равишда сув ича олмаган ва овқатлана олмаган. Ўша куни кечқурун аёл вафот этган ва 13 сентябрь куни дафн этилган.

Ҳодиса оила аъзоларидан бири томонидан эълон қилинганидан сўнг Хитой ижтимоий тармоқларида кенг муҳокамаларга сабаб бўлган. Интернет фойдаланувчиларининг воқеа чинлигига шубҳа билан қараганига қарамай, муаллиф яқин инсонининг ўлими ҳақида ҳеч ким бундай тафсилотларни тўқиб чиқармаслигини маълум қилган. Қариндошларнинг сўзларини маҳаллий аҳоли ва қишлоқ мулозими ҳам тасдиқлаган. У тобут чуқур музлатиш режимида эмас, балки енгил совутиш режимида ишлаганини, бу эса аёлнинг ҳаётини сақлаб қолганини айтган.

Шифокорлар юз берган ҳодисани “сохта ўлим” деб атаган. Бу ҳолатда инсонда метаболизм (моддалар алмашинуви) критик даражада секинлашади, нафас олиш ва пульс эса деярли сезилмайди. Беморнинг ўзи эса ўлим билан адаштириш жуда осон бўлган чуқур кома ҳолатига тушади. Шифокорлар айнан шу сабабли ўлимни қайд этиш учун ҳамиша қаътий профессионал мезонлар қўлланилишини таъкидлайди.

Эслатиб ўтамиз, аввалроқ Туркиянинг Истанбул шаҳридаги масжидда 80 ёшли Ҳалит Байшунинг жанозаси давомида унинг тирик экани аниқланганди.