Россия ва Шимолий Корея ўртасида илк автомобиль кўприги очилди

Россия ва Шимолий Корея Туманган дарёси орқали ўтувчи биринчи автомобиль кўпригини очди. Бу ҳақда Россиянинг давлат агентлиги ТАСС хабар берди.

Бир километр узунликдаги икки қаторли кўприк икки давлат ўртасидаги стратегик шерикликни мустаҳкамлашда муҳим қадам сифатида баҳоланмоқда. У Россиянинг Хасан шаҳри ва Шимолий Кореянинг Ресон шаҳри яқинидаги ҳудудларни боғлайди.

Қайд этилишича, кўприкнинг очилиш маросимида Россия Бош вазири Михаил Мишустин ва Шимолий Корея Бош вазири Пак Тхэ Сон видеомулоқот орқали иштирок этган. Мишустиннинг таъкидлашича, янги транспорт йўлаги икки давлат ўртасида савдо-иқтисодий, илмий-технологик ва маданий ҳамкорликни ривожлантиришга хизмат қилади.

Янги кўприк мавжуд темирйўл “Дўстлик кўприги” яқинида қурилган. Ушбу темирйўл кўприги 1959 йилда ишга туширилган бўлиб, янги автомобиль йўли Россия ва Шимолий Корея ўртасидаги транспорт алоқаларини кенгайтириш имконини беради.

Кўприк қурилиши 2025 йил апрелида, Россия Президенти Владимир Путиннинг 2024 йилда Шимолий Кореяга ташрифи давомида эришилган келишувлардан сўнг бошланган.

Москва ва Пхеньян сўнгги йилларда, хусусан, Россиянинг Украинадаги уруши бошланганидан кейин муносабатларни сезиларли даражада чуқурлаштирди. Янги кўприк икки давлат ўртасидаги иқтисодий ва логистика алоқаларини янада кучайтириши кутилмоқда.

Эслатиб ўтамиз, аввалроқ Россия Президенти Владимир Путин Россия ва Шимолий Корея минтақавий хавфсизлик масалалари бўйича ҳаракатларни мувофиқлаштираётганини маълум қилганди.