Россия ва Шимолий Корея хавфсизлик бўйича ҳамкорлик қилмоқда – Путин

Россия Президенти Владимир Путин Россия ва Шимолий Корея минтақавий хавфсизлик масалалари бўйича ҳаракатларни мувофиқлаштираётганини маълум қилди. Бу ҳақда Шимолий Корея марказий телеграф агентлиги (KCNA) хабар берди.

KCNA маълумотига кўра, КХДР раҳбари Ким Чен Ин кеча, 14 август куни Пхеньяндаги Озодлик минорасига ташриф буюриб, Иккинчи жаҳон уруши йилларида Японияга қарши жанг қилган совет аскарлари хотирасини ёд этган. Ким Чен Ин номидан қўйилган гулчамбарга “Биз Совет армияси шаҳидларининг жасоратини унутмаймиз” деган сўзлар ёзилган.

Ким Чен Ин икки давлат ўртасидаги қон-қардошлик ва жанговар дўстлик мероси кенгайиб бораётган муносабатларнинг асосига айланганини таъкидлаган.

Шунингдек, Россия Хавфсизлик кенгаши раиси ўринбосари Дмитрий Медведев ҳам Ким Чен Инга табрик йўллаган.

Хабарда қайд этилишича, ушбу баёнотлар ва Ким Чен Иннинг ташрифи Москва ҳамда Пхеньян ўртасидаги алоқалар тобора чуқурлашаётганини кўрсатмоқда. Бу эса Шимолий Кореянинг Украинадаги урушда Россияни қўллаб-қувватлаётгани ҳақидаги халқаро хавотирларни кучайтирган.

Украина Президенти Владимир Зеленский бир неча бор Россия Украинага қарши Шимолий Корея ракеталаридан фойдаланаётганини айтган. У Пхеньянни Москвага ракета ва ўқ-дорилар етказиб беришда, шунингдек, уруш учун қўшимча қўшинлар ваъда қилишда айблаган.

Таҳлилчиларнинг фикрича, Пхеньян қурол дастурларини оқлаш ва Пекин ҳамда Москва қўллаб-қувватловини кучайтириш мақсадида Шимоли-Шарқий Осиёни рақобатлашаётган блоклар ўртасидаги майдон сифатида кўрсатишга интилмоқда.

Эслатиб ўтамиз, аввалоқ Украина Президенти Владимир Зеленский Пхеньян Россия ҳудудига иттифоқчисини қўллаб-қувватлаш учун 30 – 50 минг нафаргача Шимолий Корея ҳарбийлари юборилиши режалаштирилганини айтганди.