Роналдунинг тўйи тафсилотлари маълум бўлди

Футбол юлдузи Криштиану Роналду узоқ йиллик севгилиси, модель ва инфлюенсер Жоржина Родригес билан тўйи кеча, 11 август куни Португалияда бўлиб ўтгани маълум бўлди. Бу ҳақда Роналдунинг вакиллари “Reuters”га маълум қилди.

Португалиялик ҳужумчи ўзининг Instagram саҳифасига хотинининг қўлида никоҳ узуклари акс этган суратни жойлаштирди.

Маълум қилинишича, йилнинг энг кутилган тўйларидан бири кеча, 11 август куни Лиссабон яқинидаги Кашкайш соҳил шаҳрида бўлиб ўтган. Маросимда жуфтликнинг беш нафар фарзанди ҳам иштирок этган.

Роналдунинг Instagram’даги пости жойлаштирилганидан 30 дақиқа ўтиб, уч миллиондан ортиқ лайк тўплаган.

Жуфтлик қарийб 10 йилдан бери бирга. Улар Жоржина ишлаган Мадриддаги Gucci дўконида танишган. Ўша пайтда Роналду “Реал Мадрид” сафида ўйнар эди.

Маълумот учун, Роналду ўтган йилнинг айнан 11 август куни севгилиси Родригесни қўлини сўраганди. Ўшанда Родригес катта никоҳ узуги акс этган суратни жойлаштириб, испан тилида “Ҳа, мен розиман. Бу сафар ҳам, бутун ҳаётим давомида ҳам”, деб ёзган.

Роналду фаолияти давомида Лиссабоннинг “Спортинг”, “Манчестер Юнайтед”, “Реал Мадрид”, “Ювентус” ва Саудия Арабистонининг “Ан-Наср” клублари сафида ўйнаган. 

Роналду яқинда фаолиятидаги олтинчи Жаҳон чемпионатида иштирок этди. Бу эркаклар ўртасидаги Жаҳон чемпионатларида энг кўп иштирок этиш рекорди бўлиб, у бу кўрсаткични аргентиналик Лионель Месси билан баҳам кўрмоқда.