Роналдино баскетбол клубини сотиб олиши мумкин

2002 йилги Жаҳон чемпионати ғолиби ва “Олтин тўп” соҳиби Роналдино Франциянинг “Монако” баскетбол клубини сотиб олиши мумкин. Бу ҳақда “L’Equipe” нашри хабар берди.

Манбага кўра, жамоа жиддий молиявий муаммоларга дуч келмоқда. Жорий йилнинг 10 август куни Роналдино “Монако” бош менежери Алексей Ефимовга мактуб йўллаб, Андорранинг Clayton Sports инвестиция фонди кўмагида клубга сармоя киритиш нияти борлигини билдирган.

“Монако” уч карра Франция чемпиони ва мамлакат чемпионатининг амалдаги ғолиби ҳисобланади. Жамоа шунингдек, икки марта Франция Кубогини ва бир марта Европа Кубогини қўлга киритган.

Маълумот учун, Роналдино 2003-2008 йилларда “Барселона” сафида тўп тепган. У каталонияликлар билан икки марта Ла Лига чемпиони бўлган ва Чемпионлар лигасида ғолиб чиққан.

Бразилиялик футболчи фаолияти давомида “Пари Сен-Жермен”, “Милан”, шунингдек, Бразилиянинг “Фламенго”, “Атлетико Минейро”, “Гремио” ва “Флуминенсе” клубларида ҳам ўйнаган.

Роналдино Бразилия терма жамоаси билан 1999 йилда Америка Кубогида ғолиб чиққан ва 2002 йил жаҳон чемпионлигини қўлга киритган.