“Реал” Мбаппенинг гаплари учун Хитой халқидан узр сўради

“Реал Мадрид” клуби француз ҳужумчиси Килиан Мбаппе ортидан юзага келган можаро сабабли Хитой халқидан расман узр сўради. Бу ҳақда клуб ўзининг расмий сайтида маълум қилди.

Аввалроқ, Мбаппенинг севимли интернет мемлари ҳақидаги интервьюси Хитойда кескин норозиликка сабаб бўлган эди. Оммавий ахборот воситалари хабарларига кўра, футболчи Хитойнинг тарихий сиёсий арбоби Мао Цзэдун билан боғлиқ мем ҳақида гапирган. Ҳодиса ортидан бир нечта Хитой компаниялари футболчи билан ҳамкорликни тўхтатган, шунингдек, Хитой марказий телевидениеси (CCTV) билан боғлиқ платформаларда Мбаппе ҳақидаги айрим материаллар олиб ташланган.

Кейинчалик Ла Лига президенти Хавьер Тебас ҳамда Мбаппенинг ўзи хитойлик мухлислардан узр сўраган эди.

“Клубимиз футболчимиз Килиан Мбаппенинг сўнгги баёнотлари туфайли юзага келган ҳар қандай ноқулайлик учун Хитой халқидан узр сўрайди. “Реал Мадрид” Хитойга, унинг тарихи, маданияти ва халқига, шунингдек, мамлакатдаги миллионлаб мухлисларимизга чуқур ҳурмат билан қарайди”, дейилади клуб расмий баёнотда.

Маълумот учун, Мао Цзэдун (1893–1976) – Хитой Халқ Республикасининг асосчиси, давлат ва сиёсат арбоби ҳамда маоизм назариясининг муаллифидир. У 1949 йилда Хитой Коммунистик партиясини ғалабага етаклаб, ХХР ташкил топганини эълон қилган ва умрининг охиригача мамлакатни бошқарган. Унинг раҳбарлиги остида Хитойда йирик ижтимоий ва иқтисодий ислоҳотлар, жумладан, “Катта сакраш” ҳамда “Маданий инқилоб” ташаббуслари амалга оширилган бўлиб, бу жараёнлар мамлакат сиёсий ва ижтимоий ҳаётига чуқур ва зиддиятли таъсир кўрсатган. Ҳозирги кунда Мао Цзэдун замонавий Хитой давлатчилигининг асосчиси сифатида мамлакат тарихида муҳим ва эътиборли ўрин эгаллайди.