Путин Украинадан кейин Молдовани эгалламоқчи – ОАВ

Россия Президенти Владимир Путин 2025 йилнинг охирида ҳарбий қўмондонлар билан ўтказилган йиғилишда 2026 йил учун НАТО ва Европа Иттифоқини ичидан парчалаш вазифасини қўйган. Бу ҳақда йиғилиш тафсилотларидан хабардор бўлган икки давлат расмийсига таяниб, “The New York Times” хабар берди.

Нашр манбаларига кўра, Кремлнинг ушбу режаларида Молдова алоҳида ўрин эгаллайди. Ғарб разведка хизматларининг маълумотларига кўра, Россия учун Украинани бўйсундириш биринчи даражали мақсад бўлса, Молдова устидан назорат ўрнатиш иккинчи ўринда туради.

Қайд этилишича, Москва Молдовани нафақат Украинага, балки Ғарбга қарши кейинги ҳаракатлар учун ҳам қулай таянч ҳудуд деб ҳисобламоқда. Путин, шунингдек, Украинанинг жанубий ҳудудларини эгаллаб, Россияни Молдова билан боғлайдиган қуруқлик йўлагини яратиш ниятидан ҳам воз кечмаган.

The New York Times’нинг ёзишича, Россия 2025 йил сентябрь ойида Молдовада ўтказилган парламент сайловларига киберҳужумлар, дезинформация кампаниялари, овоз сотиб олиш ва тарғибот ишлари орқали аралашишга уринган.

Нашр манбаларига кўра, бу жараёнга Молдова руҳонийлари ҳам жалб этилган. Молдова руҳонийлари Россияга олиб борилган ва у ерда уларга банк карталари берилган. Кейинчалик улар Молдовага қайтиб, фуқароларни Европа Иттифоқига қўшилиш бўйича референдумга қарши овоз беришга ундаши керак бўлган.

Бундан ташқари, Сербия, Босния ва Москва яқинидаги махсус лагерларда юзлаб Молдова фуқаролари қурол ишлатиш, полиция тўсиқларини ёриб ўтиш, дронлардан фойдаланиш ҳамда қўлбола портловчи қурилмалар тайёрлаш бўйича тайёргарликдан ўтгани айтилмоқда. Ғарб разведкаси ушбу лагерлар Россия Ҳарбий разведкаси билан боғлиқ шахслар томонидан ташкил этилганини билдирган.

Молдова Президенти хавфсизлик масалалари бўйича маслаҳатчиси Станислав Секриерунинг фикрича, Россия Молдовани Украина ва Европа Иттифоқига қарши ҳаракатлар учун таянч ҳудудга айлантиришга уринмоқда.

Бироқ Молдова ҳукумати бу уринишларнинг олдини олган. Сайловлар арафасида мамлакат полицияси юзлаб тинтувлар ўтказиб, махсус лагерларда тайёрланган шахсларни қўлга олган. Киберхавфсизлик мутахассислари эса Ғарб давлатлари кўмагида хакерлик ҳужумларини қайтарган.

Натижада Президент Майя Санду партияси парламентдаги кўпчиликни сақлаб қолган.

“Биз бир жангда ғалаба қозондик. Аммо урушда ҳали ғалаба қозонмадик”, деган Молдова Киберхавфсизлик агентлиги директори Михай Лупашку.

Эслатиб ўтамиз, аввалроқ Россия Президенти Владимир Путин Украинадаги уруш давом этаётган бир пайтда НАТО давлатларидан бирига чекланган ҳужум уюштириб, альянснинг қатъиятини синаб кўриши мумкинлиги ҳақида хабар берилган эди.