Путин билан Туркияда музокара ўтказишга тайёрман – Зеленский

Украина Президенти Владимир Зеленский Россия раҳбари Владимир Путин билан Туркияда музокара ўтказишга рози. У бу ҳақда CNN Turk телеканалига берган интервьюсида айтиб ўтди. 

Зеленский 31 октябрь куни Туркия Президенти Ражаб Тойиб Эрдўғаннинг таклифи билан Истанбулга борган. Бу икки давлат раҳбарининг сўнгги тўрт ой давомидаги учинчи учрашуви бўлди. Мулоқот чоғида Туркияда Украина, Россия ва Туркия иштирокида уч томонлама музокара ўтказиш имконияти ҳам муҳокама қилинган. Зеленский бундай ташаббусни маъқуллашини билдириб, Анқара учрашувни ташкил этишга муваффақ бўлса, бундан мамнун бўлишини айтган.

“Россия билан уруш якунланиши керак. Туркиянинг воситачилик қилишига умид қиламан. Путин билан Туркияда учрашишга тайёрман”, дейди Украина Президенти.

Энергетик сулҳ ва Қора денгиздаги хавфсизлик

Эрдўған билан музокараларда қиш мавсуми яқинлашиб келаётгани ва Россиянинг баллистик ракеталар билан ҳужумлари давом этаётгани инобатга олиниб, энергетик сулҳ масаласи ҳам кўтарилган. Шунингдек, озиқ-овқат хавфсизлиги, Қора денгизда кемалар ҳаракатини хавфсиз таъминлаш ва савдони эркинлаштириш бўйича фикр алмашилган.

Зеленский 2022 йилда Қора денгиз орқали дон ташиш йўлагини очишда Эрдўғаннинг ҳиссасини алоҳида эътироф этган. Ўша пайтда Россия Украина портларини блокада қилган шароитда келишув ғаллани Африка ва озиқ-овқатга эҳтиёж сезаётган бошқа мамлакатларга етказиш имконини берган.

“Украинасиз унинг тақдирини ҳал қилиб бўлмайди. Суверенитетимиз ва ҳудудий яхлитлигимизни ҳам Украинасиз муҳокама қилиш мумкин эмас. Кўплаб етакчилар аввал ҳам Украина тақдирини бизсиз ҳал қилишга уринган, бироқ ҳеч бири натижа бермаган. Келишувга эришиш учун уришаётган томонларнинг ўзи музокара столида бўлиши керак”, дейди Зеленский.

Шунингдек, у Россия Украина ҳудудини уч кун ичида эгаллашни режалаштирган бўлса-да, қарийб беш йилдан бери бу мақсадига эриша олмаганини қайд этган.

Эслатиб ўтамиз, аввалроқ Владимир Зеленский Туркия етакчиси Ражаб Тойиб Эрдўған билан музокара ўтказиш учун Истанбулга боргани ҳақида хабар берилган эди.