Помидор фестивали: Испанияда минглаб одамлар “помидорбўрон” ўйнади (фоторепортаж)

Кеча, 26 август куни Испаниянинг Валенсия ҳудудидаги кичик Буньол шаҳрида ҳар йили ўтказиладиган “La Tomatina” фестивали бўлиб ўтди. Бу ҳақда “Associated Press” хабар берди. 

Фестиваль пайтида помидор ортилган юк машиналари шаҳар кўчаларидан ўтиб, иштирокчиларни помидорга кўмиб ташлади. Оломoн ҳам қаршилик кўрсатмай, қўлига тушган помидорларни бир-бирига қарата улоқтирди. Кўчаларда байрамона мусиқа янгради, бир неча дақиқаларда одамларнинг оппоқ кийимлари қизил, пушти рангга кирди.

Фестивалга тайёргарлик жараёнида шаҳардаги бинолар помидор шарбатидан ҳимоялаш учун махсус ёпқичлар билан ўраб чиқилган. Фестиваль бир соатдан ортиқ давом этган. “La Tomatina” анъанавий равишда ҳар йили август ойининг сўнгги чоршанбасида ўтказилади.

“La Tomatina” анъанаси 1945 йилда юз берган тасодифий озиқ-овқат жанжалидан бошланган. Кейинчалик у ҳар йили ўтказиладиган тадбирга айланган, бироқ 1950 йилларда Испания диктатори Франсиско Франко даврида тақиқланган. 1980 йилларда фестивалнинг телевидениеда кенг ёритилиши уни бутун Испанияда, кейинчалик эса халқаро миқёсда машҳур бўлишига хизмат қилган.

Ушбу йил бўлиб ўтган фестивалда 20 мингдан ортиқ киши қатнашган. Сўнгги уч йил давомида фестиваль иштирокчиларининг қарийб 40 фоизини Испаниядан ташқаридан келган сайёҳлар ташкил этган.

Охирги йилларда Ҳиндистондан келаётган сайёҳлар сони сезиларли даражада ошган. Бунга 2011 йилда суратга олинган “Ҳаёт жўшқин” (“Zindagi Na Milegi Dobara”) Болливуд фильми сабаб бўлган. Фильмда уч дўст Испания бўйлаб саёҳат қилиб, La Tomatina фестивалида иштирок этишгани намойиш этилган.

Ҳиндистонлик 40 ёшли Мазҳар ва Санья Хонлар фестивалга фильм таъсирида келган. Мазҳар Хоннинг айтишича, “La Tomatina”да қатнашиш уларнинг ўн йилдан ортиқ вақт давомида амалга оширишни истаган орзуси бўлган.

Фестивалга Польша­дан келган 32 ёшли Йоанна Втжишшевска ҳам тадбир кутилганидан анча “телбароқ” бўлганини айтган. Унинг сўзларига кўра, фестиваль фильмда кўрсатилганидан ҳам яхшироқ таассурот қолдирган.

Хорижий давлатдан келган иштирокчилар фестивалга кириш учун 15 евро тўлайди. Тадбирнинг асосий қоидаси эса помидорларни улоқтиришдан олдин эзиб ташлашдир. Бу одамларнинг жароҳатланишининг олдини олиш учун белгиланган. Шунга қарамай, кўплаб иштирокчилар кўзойнак ва қулоқ тиқинларидан ҳимоя воситаси сифатида фойдаланади.

Бир соатлик помидор жанги махсус сигнал берилиши билан якунланган. Шундан сўнг иштирокчилар яқин атрофдаги умумий душларда помидор қолдиқларини ювиб ташлаган, шаҳарнинг кўчалари эса сув билан тозаланган.

Қизиғи шундаки, помидор доғлари кийимларда доимий қолиши мумкин бўлса-да, помидор таркибидаги лимон кислотаси тозаловчи хусусиятга эга. Шу сабабли фестивалдан кейин Буньол кўчалари баъзан аввалгидан ҳам тозароқ ҳолатга келади.

Эслатиб ўтамиз, 2025 йил 27 август куни Испаниянинг Буньол шаҳрида “La Tomatina” помидорлар фестивали бўлиб, унда минглаб одамлар бир-бирига 120 тонна помидор отган эди.