“Нозик нуқта”. Пентагон илк бор ўқ-дори танқислигини тан олди

north_east

“Бизда ўқ-дориларнинг чексиз захираси бор”. Трамп мақтанчоқлик қилди

Пентагон Эрон билан уруш оқибатида ўқ-дорилар танқислиги юзага келганини илк бор расман тан олди. Бу ҳақда АҚШ Мудофаа вазирлиги бош инспекторининг 28 февралда бошланган Эронга қарши кампания – Пентагон томонидан “Эпик ғазаб” (Epic Fury) деб номланган операция ҳақидаги биринчи чораклик ҳисоботида сўз боради.

Идора маълумотларига кўра, жорий йил 28 февралдан 30 июнгача бўлган даврда Эронга қарши ҳарбий ҳаракатлар 33,4 миллиард долларга тушган, шундан 22,3 миллиард доллари сарфланган ўқ-дориларга, яна 3,7 миллиард доллари эса йўқотилган техникага тўғри келади. Ҳарбий вазирнинг харидлар ва таъминот бўйича ўринбосари бошқармаси операция давомида ўқ-дориларнинг сарфланиши “стратегик захираларнинг танқислигига олиб келганини ва уларни тўлдиришда мудофаа-саноат базасидаги нозик нуқталарни юзага чиқарганини” маълум қилган.

Пентагоннинг аниқлик киритишича, идора ишлаб чиқариш тармоқларини жадаллаштириш, мудофаа корхоналари қувватини кенгайтириш ҳамда муҳим материаллар ва компонентларни жамлаш устида ишламоқда, бироқ бунинг учун соҳага “сезиларли вақт” талаб этилади. Ҳисоботга кўра, энг жиддий муаммолар қаттиқ ёқилғили ракета двигателлари, портловчи моддалар ва порох ишлаб чиқаришда, шунингдек, малакали ишчиларни ёллашда сақланиб қолмоқда.

Қайд этиш жоиз, Президент Дональд Трамп ва Пентагон раҳбари Пит Хегсет бир неча бор ўқ-дорилар танқислигини рад этиб, АҚШ Қуролли кучларида ҳарбий ҳаракатларни олиб бориш учун қурол-яроғ етарли эканини айтган эди. 24 июнь куни Оқ уй Конгрессга 87,6 миллиард доллар миқдоридаги шошилинч қўшимча молиялаштириш сўровини юборган, шундан 67,1 миллиард доллари Мудофаа вазирлигига – биринчи навбатда ўқ-дориларни тўлдириш ва Эронга қарши операция харажатларини қоплаш учун мўлжалланган.

Эслатиб ўтамиз, аввалроқ АҚШ ҳукумати Эрон билан уруш сабабли ўқ-дорилар танқислиги ҳақидаги маълумотларнинг сизиб чиқиши ушбу маълумотлардан фойдаланиш ҳуқуқига эга бўлган тор доирадаги шахслар орасидаги хорижий разведка агенти туфайли юз берган бўлиши мумкинлигидан хавотирга тушгани ҳақида хабар берилган эди.