Наманганда кредит таклиф қилиб, фуқаролардан 250 млн сўмдан ортиқ пул олган шахс ушланди (видео)

Наманган вилоятининг Косонсой туманида Telegram орқали кам фоизли кредит ваъда қилиб, фуқаролардан 250 миллион сўмдан ортиқ пул олганликда гумонланаётган шахс қўлга олинди. Бу ҳақда вилоят Ички ишлар бошқармаси маълум қилди.

Қайд этилишича, гумонланувчи Telegram мессенжерида “Микрокредит” номли сохта саҳифа очиб, фуқароларга кам фоизли кредит таклиф қилган. У кредитни расмийлаштириш баҳонасида улардан олдиндан банк карталарига пул ўтказишни сўраган. Фуқаролар пулни ўтказганидан кейин эса кредит ажратилмаган ва улар билан алоқа узилган.

Дастлабки маълумотларга кўра, фирибгарлик оқибатида етказилган зарар 250 миллион сўмдан ошган.

Гумонланувчи аввал ҳам фирибгарлик учун судланганини, бу сафар эса оилавий шароити яхши бўлмагани сабабли жиноятни такрорлаганини билдирган. У фуқароларнинг пулларини ўз эҳтиёжларига сарфлаганини айтиб, қилган ишидан пушаймонлигини билдирган.

Мазкур ҳолат юзасидан Наманган вилояти ИИБ Кибержиноятларга қарши курашиш бошқармаси ходимлари томонидан тезкор-қидирув тадбирлари ўтказилиб, гумонланувчи қўлга олинган.

Билдирилишича, ҳолат бўйича Жиноят кодексининг 168-моддаси (фирибгарлик) учинчи қисмининг “б” ва “в” бандлари билан жиноят иши қўзғатилган. Ҳозирда терговга оид процессуал ҳаракатлар олиб борилмоқда.

Эслатиб ўтамиз, аввалроқ Қорақалпоғистонда хорижлик кибержиноятчилар билан тил бириктириб, қарийб 250 нафар фуқаронинг банк карталаридан 3 млрд сўмга яқин пулни ўғирлаган уч нафар ёш қўлга олингани ҳақида хабар берилган эди.