250 га яқин одамнинг шўрини қуритган кибержиноятчилар ушланди (видео)

Қорақалпоғистонда хорижлик кибержиноятчилар билан тил бириктириб, қарийб 250 нафар фуқаронинг банк карталаридан 3 млрд сўмга яқин пулни ўғирлаган уч нафар ёш қўлга олинди. Бу ҳақда Қорақалпоғистон Республикаси Ички ишлар вазирлигининг Кибержиноятларга қарши курашиш бошқармаси хабар берди.

Қайд этилишича, Нукус шаҳрида яшовчи, 2004 йилда туғилган, аввал ўғрилик жинояти учун судланган М. исмли фуқаронинг телефонини текшириш давомида Telegram мессенжеридаги ёпиқ каналлардан бирида хорижлик фойдаланувчилар билан ёзишмалари аниқланган.

Маълум бўлишича, у 2025 йил 1 августдан бошлаб Telegram’даги “Tom” ва “Mel” номли аккаунт эгалари билан ҳамкорлик қилган. Улар фуқароларнинг банк карталари маълумотлари ва SMS тасдиқлаш кодларини қўлга киритиш орқали ҳисобларидаги пулларни ечиб олиш билан шуғулланган.

Жиноят схемасига кўра, хорижлик шериклар фуқароларга APK форматидаги зарарли файлларни тарқатган. Ушбу файлларни юклаб олганларнинг банк карталарига оид маълумотлар ва ҳисобидаги маблағлар ҳақидаги ахборот жиноятчиларга бориб тушган. Шундан сўнг М. олинган маълумотлар ёрдамида операцияларни амалга ошириб, пулларни шериклари тақдим этган бошқа банк карталарига ўтказган.

Унинг айтишича, карталардан ўғирланган маблағларнинг 15 фоизи USDT криптовалютаси кўринишида ўзига берилган. У айрим кунлари 2-3 млн сўмгача даромад топган. Тергов давомида М. верификациядан ўтказиш учун одам топишда қийналгач, ўзига яна икки нафар шерик ёллагани аниқланган.

Жумладан, 2004 йилда туғилган, илгари судланмаган Э. исмли фуқаро одамларни оз миқдордаги пул эвазига верификациядан ўтказиб, уларнинг номидан молиявий операцияларни амалга оширган. У ўз кўрсатмасида 2025 йил декабрь ойи бошида таниши иш таклиф қилганини, вазифаси верификациядан ўтадиган одамларни топиш ва уларга тегишли маълумотларни тизимга киритишдан иборат бўлганини билдирган. Бунинг эвазига у ўтказилган маблағларнинг 5 фоизини олган, верификациядан ўтган фуқароларга эса 50-100 минг сўмдан берган.

Гуруҳнинг яна бир аъзоси – А. исмли фуқаро эса моддий манфаат эвазига бошқа шахсларни мобил тўлов иловаларида верификациядан ўтказиш, уларнинг номига виртуал банк карталари очиш ҳамда бошқа молиявий хизматлардан фойдаланиш учун зарур маълумотларни тайёрлаш билан шуғулланган. Бунинг учун у фуқароларга 100–200 минг сўм миқдорида ҳақ тўлаган.

Маълум қилинишича, айрим иштирокчилар жиноят эканини англаб, бу фаолиятни тўхтатмоқчи бўлганида, уларга босим ўтказилган. Улардан бирининг айтишича, жиноятни давом эттиришга мажбурлаш мақсадида унинг шахсий суратлари ва маълумотларини тарқатиш, уйига одам юбориш билан таҳдид қилинган.

Билдирилишича, мазкур ҳолат юзасидан Жиноят кодексининг тегишли моддаси билан жиноят иши қўзғатилган. Тергов ҳаракатлари якунланиб, иш ҳужжатлари жазо тайинлаш масаласини кўриб чиқиш учун судга юборилган.

Шунингдек, Қорақалпоғистонда шу каби жиноятларни содир этган яна саккизта гуруҳ аниқланиб, уларнинг аъзолари қўлга олинган. Ҳозирда улар юзасидан тергов ҳаракатлари олиб борилмоқда. Ушбу гуруҳларнинг еттитаси Қорақалпоғистонда яшовчи ёшлардан, биттаси эса бошқа вилоят вакилларидан ташкил топгани айтилмоқда.

Эслатиб ўтамиз, аввалроқ Фарғона вилоятида 19 ёшли йигит фирибгарлик ва кибержиноятда гумонланиб ушлангани ҳақида хабар берилган эди.