Моуриньо “Реал”га қандай футболчилар керакмаслигини Родри мисолида тушунтирди

“Реал Мадрид” бош мураббийи Жозе Моуриньо Родрини “Барселона” ўтганига муносабат билдирар экан, клуб катта мавқега эга эканлигини ва у ўз сафида ўйнашни хоҳлаётганига ишончи комил бўлмаган футболчиларни таркибда сақлаб қола олмаслигини айтди. Бу ҳақда бош мураббий Жозе Моуриньо AS нашрига берган интервьюсида сўз очди. 

2026 йилги Жаҳон чемпионатининг энг яхши футболчиси ва 2024 йилги “Олтин тўп” соҳиби Родрига “Реал Мадрид”дан таклиф тушган, бироқ испаниялик ярим ҳимоячи “Барселона”ни танлаганди.

Моуриньо Родри билан бир неча бор суҳбатлашганини ва “Реал Мадрид” футболчига жуда яхши таклиф берганини айтди.

“Родрининг шубҳалари бор эди, у иккиланди... Унинг шубҳалари менга ҳам таъсир қилди. У ажойиб футболчи ва у биз билан жуда профессионал тарзда ишлади. Мен у ҳақида ёмон гап айта олмайман. Аммо “Реал Мадрид” шунчалик юқори савиядаги клубки, унда иккиланадиган футболчилар бўлиши мумкин эмас”, дейди Моуриньо.

Унинг сўзларига кўра, “Реал Мадрид”нинг тамойили шундан иборатки, клуб футболчи билан боғланганида, ўйинчи жавобан қачон жамоага қўшилиши кераклигини сўраши лозим.

“Бу ерда концепция жуда оддий: “Реал Мадрид” футболчига мурожаат қилганида, у “Қачон етиб боришим керак?” деб сўраши керак”, дея қўшимча қилган мураббий.

Эслатиб ўтамиз, аввалроқ “Манчестер Сити” ярим ҳимоячиси Родри “Барселона”га ўтгани ва клуб билан 2030 йилга қадар шартнома имзолагани ҳақида хабар берилганди.