Мигрантларнинг Россиядан Ўзбекистонга пул жўнатмалари кўпайди

Жорий йилнинг учинчи чорагида Россиядан МДҲ давлатларига пул ўтказмалари бўйича олти йиллик рекорд янгиланди. Ўзбекистон, Тожикистон ва Қирғизистон фуқаролари пул ўтказмалари бўйича етакчи бўлди.

Россия Банкининг маълумотларига кўра, июль-сентябрь ойларида Россиядан МДҲ мамлакатларига тўлов тизимлари орқали трансчегаравий ўтказмалар 2,29 миллиард долларга етди. Бу сўнгги олти йилдаги рекорд кўрсаткич бўлиб, маблағлар ҳажми фақат 2015 йилнинг иккинчи чорагида кўпроқ бўлган – 2,31 миллиард доллар. 

Қабул қилувчилар орасида Россия Федерациясидан 1,01 миллиард доллар (ўсиш 34,9 фоиз) ўтказилган Ўзбекистон етакчилик қилди. Кейинги ўринларни Тожикистон — 0,53 миллиард доллар (25,5 фоиз) ва Қирғизистон — 0,43 миллиард доллар (21,7 фоиз) эгаллади.

Ўсиш сабабларидан бири МДҲ давлатларидан мигрантлар оқимининг кўпайиши, биринчи навбатда, қурилиш, уй-жой коммунал хўжалиги ва бошқа тармоқларда ишчи кучи тақчиллигини тўлдириш учун Ўзбекистон ва Тожикистондан ишчи кучининг ташкилий олиб келиниши ҳисобига бўлди.