Месси Жаҳон чемпионатлари тарихидаги энг яхши ассистентга айланди

Аргентина миллий терма жамоаси ҳужумчиси Лионель Месси Жаҳон чемпионатлари тарихида энг кўп голли узатма берган футболчига айланди. У бу борада 1986 йилги жаҳон чемпиони Диего Марадонани ортда қолдирди.

Месси ушбу натижага Жаҳон чемпионатининг 1/8 финал босқичида Мисрга қарши ўйинда эришди. У Кристиан Ромеронинг голига ассист муаллифи бўлиб, мундиаллардаги голли узатмаларининг сонини 9 тага етказди. Жаҳон чемпионатларида ассистлар статистикаси 1966 йилдан бери юритиб келинади.

Атлантада бўлиб ўтган Аргентина – Миср баҳси эса ҳақиқий драматик сценарий асосида кечди. Миср терма жамоаси Яссер Иброҳимнинг 15-дақиқадаги ва Мустафо Зиконинг 67-дақиқадаги голлари эвазига 2:0 ҳисобида олдинга чиқиб олди.

Бироқ учрашувнинг ҳал қилувчи дақиқалари амалдаги жаҳон чемпионлари фойдасига кечди. 79-дақиқада Кристиан Ромеро Лионель Мессининг узатмасидан кейин ҳисобни қисқартирди. Орадан тўрт дақиқа ўтиб, Мессининг ўзи ҳисобни тенглаштирди ва турнирдаги саккизинчи голини уриб, тўпурарлар пойгасидаги пешқадамлигини мустаҳкамлади. Эътиборлиси, у биринчи бўлимда пенальтини аниқ амалга ошира олмаган эди.

Қўшимча вақтнинг иккинчи дақиқасида Лаутаро Мартинеснинг узатмасини голга айлантирган Энцо Фернандес Аргентинага иродали ғалабани тақдим этди – 3:2.

Маълумот учун, Аргентина терма жамоаси чорак финалда Швейцарияга қарши баҳс олиб боради. Ушбу учрашув жорий йилнинг 12 июль куни бўлиб ўтади.