Мелиқўзиев WBA чемпионлик камари учун курашиш имкониятидан маҳрум бўлди

Ўзбекистонлик профессионал боксчи Бектемир Мелиқўзиев WBA ташкилотининг супер ўрта вазн тоифасидаги жаҳон чемпиони Хайме Мунгияга қарши мажбурий даъвогар сифатида жанг қилиш имкониятидан маҳрум бўлди. Бу ҳақда “Dazn” нашри хабар берди.

“Riyadh Season” ташкилотчилари жорий йилнинг 31 октябрь куни Саудия Арабистонининг Ар-Риёд шаҳрида ўтказиладиган бокс кечасининг тўлиқ жанглар рўйхатини эълон қилди.

Кечанинг асосий жанги мексикалик собиқ мутлақ жаҳон чемпиони Сауль “Канело” Альварес ҳамда мағлубиятсиз франциялик Кристиан Мбилли ўртасида бўлиб ўтади. Улар WBC чемпионлик камари учун жанг қилади.

Шунингдек, Хайме Мунгия WBA рейтингида тўққизинчи ўринда турган мағлубиятсиз россиялик Никита Цзюга қарши чемпионлик камарини ихтиёрий ҳимоя қилади.

Жорий йилнинг сентябрь ойида WBA ташкилоти мексикалик боксчига бир йилдан ортиқ вақт давомида мажбурий даъвогар мақомига эга бўлиб келган Бектемир Мелиқўзиевга қарши чемпионлик камарини ҳимоя қилишни буюрган эди. Томонларга музокаралар олиб бориш учун жорий йилнинг 21 октябрга қадар муддат берилганди.

Эслатиб ўтмиз, аввалроқ, Хайме Мунгия жамоаси Мелиқўзиевга чемпионлик жангида қатнашишдан воз кечиши эвазига молиявий товон пули таклиф қилгани ҳақида хабар берилган эди. Бироқ ўзбекистонлик боксчи бу таклифни рад этиб, ҳатто гонорар олмасдан ҳам жанг қилишга тайёрлигини билдирган.