Мажлис очилди: Эрдўған нутқ сўзлаётганда мухолифат залдан чиқиб кетди (видео)

Кеча, 1 октябрь куни Туркия Буюк Миллат Мажлиси (ТБММ) янги қонунчилик йилига киришди. Бош ассамблеяни очган Мажлис раиси Нўмон Куртулмушнинг янги конституция ва жамғарма инқирозига оид баёнотлари эътиборни тортди. АКП раҳбари ва Президент Ражаб Тойиб Эрдўған нутқ сўзлашни бошлаган пайтда “YENİ Parti” (Янги партия) раиси Ўзғур Ўзел ва партия депутатлари залини тарк этди. Бу ҳақда “Medya scope” хабар берди.

Ўзел Жумҳурият халқ партияси (CHP) етакчиси сифатида 2025 йилда Мажлиснинг очилишини бойкот қилган. Ушбу қарор ҳам баҳс-мунозараларга сабаб бўлган бир пайтда, Ўзел ва депутатлар “YENİ Parti” сифатида илк бор қаршилаётган янги қонунчилик йилини Эрдўғанга қарши протест билан бошлаган.

Бош ассамблея йиғилишидан олдин Нўмон Куртулмуш раислигида “YENİ Parti” етакчиси Ўзғур Ўзел, АКП фракцияси раҳбари Абдуллоҳ Гулер ҳамда Мажлис раиси ўринбосарлари, партияларнинг фракция раҳбарлари ва депутатлар Отатурк ҳайкали пойига гулчамбар қўйган. Маросимда Ички ишлар вазири Мустафо Чифтчи ҳам иштирок этган.

Буюк Миллат Мажлиси 28-чақириқ 5-қонунчилик йили соат 14:00 да тўпланган Бош ассамблея билан расман бошланган. Куртулмуш Эрдўғанни минбарга таклиф қилганда “YENİ Parti”, “İYİ Parti” ва CHP депутатлари ўринларидан турмаган. Истиқлол марши ва сукут сақлаш маросимидан сўнг Эрдўған нутқини бошламоқчи бўлганида “YENİ Parti” депутатлари залини тарк этган. Эрдўған бир муддат “YENİ Parti” ўриндиқлари бўшашини кутиб турган. Бу орада АКП сафидан Эрдўған шаънига қарсаклар янграган. 

Ўзғур Ўзел жорий йилнинг 30 сентябрь “Medyascope”нинг Мажлис очилишида нима қилишлари ҳақидаги саволига: 

“Эртага Мажлисдаги ўзимизнинг ўрнимизни эгаллаймиз, мажлисда иштирок этамиз. Сўнгра ҳамкасбларимиз ўз сайлов округларидаги дастурлар учун жўнаб кетишади”, деган. 

Қабул маросимида иштирок этмаслиги маълум бўлган “YENİ Parti”дан бошқа бир протест кутилмаётган эди ва бу ҳақда депутатлардан ҳам ҳеч қандай маълумот чиқмаган.

Куртулмушнинг нутқи пайтида “YENİ Parti” сафларида ҳаракатланиш бошланганидан протестга тайёргарлик кўрилаётгани аён бўлди. Ўзғур Ўзел ва фракция раҳбарлари орқа қатордагиларга нималарнидир айтган. Депутатлар ҳам орқаларига ўгирилиб, қаторма-қатор залини тарк этиш қарорини бир-бирларига етказган. Эрдўған минбарда турган пайтда Истиқлол марши ўқилган, Ўзел ва “YENİ Parti” депутатлари Истиқлол маршидан сўнг ўз жойларига ўтирмасдан зални тарк этган.

Залдан чиқиб кетаётиб, журналистларнинг саволига жавобан Ўзел шундай деган: 

“Асосий мухолифат партияси сифатида Мажлис очилишида иштирок этдик, Мажлис раисининг нутқини тингладик, Истиқлол маршимизни ўқидик. Бундан буён партиямизга нисбатан суд тўнтаришини амалга ошириб, партия бош раиси ва раҳбариятини ўзгартириб, ўрнига ўзига маъқул бўлган тайинловни бажарган, президентликка номзодимизни қамоққа ташлаган, бугун эрталаб Туркия Шаҳар ҳокимликлари уюшмаси сайловларида ғалаба қозониш учун айбсиз ва гуноҳсиз Мерсин шаҳар ҳокимига қарши операция уюштирган кимдирни эшитишга сарфлайдиган вақтимиз йўқ”.

Бироздан сўнг Ўзел Мажлисга қайтиб, ўз партиясининг Марказий ижроия кенгашини тўплаган.

Эслатиб ўтамиз, аввалроқ Туркиянинг асосий мухолифатдаги Жумҳурият халқ партиясининг (CHP) суд қарори билан лавозимидан четлатилган собиқ раиси Ўзғур Ўзел партиядан расман чиқиши ва янги сиёсий партия тузаётганини маълум қилган эди.