Майамида самолёт қулаб, ёниб кетди. Қурбонлар бор (видео)

АҚШнинг Флорида штатидаги Майами халқаро аэропортида Amazon Prime Air юк самолёти қўниш вақтида учиш-қўниш йўлагидан чиқиб кетиб, бир нечта транспорт воситасига урилди. Ҳодиса оқибатида камида 5 киши ҳалок бўлди, яна 5 киши жароҳатланди. Бу ҳақда “Reuters” хабар берди.

Ҳодиса кеча, 6 сентябрь куни маҳаллий вақт билан соат 14:00 га яқин содир бўлган. Amazon Prime Аir’нинг 7598-рейси Пуэрто-Риконинг Сан-Хуан шаҳридан Майамига учиб келган. Самолёт аэропортнинг диагональ учиш-қўниш йўлагига қўниш вақтида йўлакдан чиқиб кетиб, атрофидаги бир нечта транспорт воситасига урилган.

Майами-Дейд округининг ёнғин хизмати бошлиғи Рей Жадаллаҳнинг маълум қилишича, жароҳатланган 5 кишидан 3 нафарининг аҳволи оғир. Шунингдек, самолёт уриб юборган транспорт воситаларида камида 2 киши, самолёт ичида эса учувчи ва иккинчи учувчи қолиб кетган. Қутқарувчилар уларни олиб чиқиш ишларини олиб борган. Ҳалок бўлганларнинг шахси эса ҳозирча расман ошкор қилинмаган.

Маълумотларга кўра, ҳодиса жойига 60 дан ортиқ қутқарув гуруҳи ва қарийб 200 нафар ходим жалб қилинган. Қутқарув ишлари давомида самолётдан ёнилғи сизиб чиқиши аниқланган ва фавқулодда хизматлар ҳудудда хавфсизлик чораларини кучайтирган. Ҳалокатдан сўнг, Майами халқаро аэропортида барча рейслар вақтинча тўхтатилган. 6 сентябрь куни кечга бориб, аэропортдаги 4 та учиш-қўниш йўлагидан иккитаси қайта фойдаланишга топширилган.

АҚШ Миллий транспорт хавфсизлиги кенгаши ҳодиса сабабларини аниқлаш учун тергов гуруҳини юборган. Терговга кенгаш раиси Женнифер Ҳоменди раҳбарлик қилмоқда. АҚШ Миллий транспорт хавфсизлиги кенгаши ҳодиса юзасидан дастлабки брифингни бугун, 7 сентябрь куни Майамида ўтказишини маълум қилган.

Amazon компанияси ҳам ҳалокат тафсилотларини аниқлаш учун маҳаллий расмийлар билан ҳамкорлик қилаётганини билдирган. Компания вакилига кўра, ҳозирги вақтда асосий эътибор ҳодисага алоқадор барча инсонларнинг хавфсизлиги ва уларга ёрдам кўрсатишга қаратилган. Boeing ва 21 Air компаниялари ҳам ҳукумат томонидан олиб борилаётган терговга ёрдам беришини маълум қилган.

Эслатиб ўтамиз, аввалроқ АҚШнинг Калифорния штатидаги Фресно шаҳри аэропорти яқинида кичик самолётнинг қулаб тушиши оқибатида икки нафар бола ҳалок бўлган эди.