Машҳур тадбиркор умрбод қамалди

Хитойнинг энг йирик кўчмас мулк компанияларидан бири бўлган Evergrande Group асосчиси Ҳуи Ка Ян бугун, 20 август куни молиявий жиноятларда айбдор деб топилиб, умрбод қамоқ жазосига ҳукм қилинди. Шэньчжэнь шаҳридаги суд тадбиркорнинг барча шахсий мол-мулкини мусодара қилишга ҳам қарор қилди. Бу ҳақда “Reuters” хабар берди.

67 ёшли Ҳуи Ка Ян 2026 йил апрель ойида ўзига қўйилган саккизта айблов бўйича айбини тан олган. У маблағлардан ноқонуний фойдаланиш, фирибгарлик йўли билан маблағ йиғиш, жамоатчилик маблағларини ноқонуний жалб қилиш, ноқонуний кредит бериш, қимматли қоғозларни фирибгарлик йўли билан чиқариш ҳамда пора олиш каби жиноятларда айбланган.

Суд маълумотларига кўра, 2016–2021 йилларда Ҳуи Ка Ян ва у назорат қилган компаниялар молиявий ҳисоботларни сохталаштириб, компания активларини сунъий равишда оширган ва мажбуриятларини яширган. Суд бу жиноятлар жуда катта миқдордаги маблағ билан боғлиқ бўлгани, мамлакат иқтисодиётига катта зарар етказгани ва жамиятга жиддий зарар келтирганини таъкидлаган.

Бундан ташқари, Evergrande компаниясига 8,82 миллиард юан (1,31 миллиард доллар), унинг асосий шўба корхонаси Hengda Real Estate’га эса 7 миллиард юан жарима солинган. Компаниянинг яна беш нафар юқори лавозимли раҳбари 6 йилдан 18 йилгача қамоқ жазосига ҳукм қилинган. Шунингдек, Evergrande билан боғлиқ 56 киши судланган.

Маълумот учун, Ҳуи Ка Ян 1996 йилда Evergrande компаниясига асос солган. У компанияни катта миқдорда қарз маблағларини жалб қилган ҳолда тез суръатларда кенгайтириб, Хитойдаги энг йирик кўчмас мулк ишлаб чиқарувчисига айлантирган. 2017 йилда унинг бойлиги 45,3 миллиард долларга баҳоланган ва у ўша пайтда Осиёнинг энг бой одами бўлган.

Бироқ компаниянинг қарзлари кескин ошиб кетган. Evergrande 2021 йилда қарзларини тўлашда муаммога дуч келиб, ўзининг қарийб 300 миллиард долларлик мажбуриятларининг катта қисмини тўлай олмай қолган. Компаниянинг қулаши Хитойдаги узоқ давом этаётган кўчмас мулк инқирозининг рамзига айланган.

2024 йилда Гонконг суди Evergrande’ни тугатиш ҳақида қарор чиқарган. 2025 йилда эса компания Гонконг фонд биржаси рўйхатидан чиқарилган. Шу тариқа бир вақтлар Хитой кўчмас мулк бозорининг етакчиси бўлган компаниянинг фаолияти якунланган.

Ҳуи Ка Ян 2023 йилда Хитой ҳукумати томонидан ҳибсга олинганидан бери жамоатчилик олдида кўринмаган эди.

Эслатиб ўтамиз, аввалроқ Хитойда собиқ адлия вазири Тан Ичун пора олишда айбдор деб топилиб, умрбод қамоқ жазосига ҳукм қилинганди.