Мартинес МЮ раҳбариятини танқид қилгани учун узр сўради

Англиянинг “Манчестер Юнайтед” клуби аргентиналик ҳимоячиси Лисандро Мартинес жамоа раҳбарияти билан ижобий суҳбат ўтказганини маълум қилди. Шунингдек, у клубнинг Чемпионлар лигасидаги мағлубиятидан кейин раҳбариятни танқид қилгани учун узр сўради. Бу ҳақда Мартинес Instagram саҳифасида маълум қилди.

Жорий йилнинг 13 октябрь куни “Манчестер Юнайтед” Чемпионлар лигасининг иккинчи босқичи доирасида Испаниянинг “Атлетико Мадрид” жамоасига қарши сафарда 0:2 ҳисобида мағлуб бўлди.

“Бугун клуб раҳбарияти ва бош мураббий билан учрашдим. Суҳбат жуда ижобий руҳда ўтди. Биз фикр алмашиш ва ўйиндан кейин юз берган воқеаларни очиқ муҳокама қилиш имконига эга бўлдик. Мағлубиятдан кейинги тушкунлик ҳиссиётларимни нотўғри вақтда ва нотўғри жойда ифода этишимга сабаб бўлди. Бунинг учун узр сўрамоқчиман. Биламанки, “Манчестер Юнайтед”даги ҳар бир инсон умумий мақсадимизга эришиш учун қўлидан келган барча ишни қилмоқда. Бу – клуб ва унинг мухлислари муносиб бўлган муваффақиятга эришишдир”, деб ёзди Мартинес Instagram’даги саҳифасида.

Учрашувдан кейинги интервьюсида Мартинес клуб раҳбариятини, хусусан, футбол директори Жейсон Уилкоксни таркибни етарлича кучайтирмаганликда танқид қилган эди. Бироқ аргентиналик ҳимоячи бош мураббий Майкл Кэррикни қўллаб-қувватлаган.

Кейинчалик “The Athletic” нашри “Манчестер Юнайтед” футболчини клуб раҳбариятини танқид қилгани учун жаримага тортиши мумкинлиги ҳақида хабар берди. Шунингдек, ушбу воқеадан кейин Мартинес билан янги шартнома имзоланиши эҳтимоли жуда паст экани таъкидланган.