Макрон Сурияда. У жойлашган меҳмонхона яқинида портлаш бўлди (видео)

Бугун, 7 июль Франция Президенти Эммануэль Макрон Сурияга тарихий ташриф билан борган пайтда Дамашқ марказида портлашлар юз берди. Бу ҳақда “Euronews” хабар берди.

Қайд этилишича, портлашлар Эммануэль Макрон Сурия Президенти Аҳмад аш-Шара билан учрашиш учун Президент саройига кирган вақтда “Four Seasons” меҳмонхонаси яқинида содир бўлган. Баъзи нашрларнинг ёзишича, Франция раҳбари айнан ушбу меҳмонхонадан қўним топган.

Маълумоталарга кўра, пойтахт марказида кетма-кет икки портлаш овози эшитилган. Воқеа жойидан катта тутун кўтарилгани айтилмоқда.

Ижтимоий тармоқларда тарқалган видеоларда кўчада ёнаётган автомобиль ва қон излари акс этган. Ҳозирча қурбонлар ва жабрланганлар сони ҳақида аниқ маълумот берилмаган. Шунингдек, портлашлар учун ҳеч бир гуруҳ жавобгарликни ўз зиммасига олмаган.

Франция томони Эммануэль Макроннинг соғ-саломат эканини маълум қилди. Президент ташриф дастурини режа асосида давом эттирмоқда.

Макрон Сурияга кеча, 7 июль куни ташриф буюрган эди. Бу ташриф Сурия янги ҳукумати ҳокимиятга келганидан буён Ғарбий Европа давлат раҳбарининг мамлакатга илк ташрифи сифатида баҳоланмоқда.

SANA хабарига кўра, Макрон Дамашқда минтақавий хавфсизлик, шунингдек, бизнес ва инвестиция масалаларини муҳокама қилиш учун борган. У Дамашқ аэропортида Сурия Ташқи ишлар вазири Асад аш-Шибани томонидан кутиб олинган.

“Мен Франциянинг Сурия халқига бўлган садоқатини намоён этиш учун келдим. Мақсадимиз – ўзининг хилма-хиллиги билан бирлашган, суверен ва қўшнилари билан тинч-тотув яшайдиган Сурия келажагини қўллаб-қувватлаш”, деб ёзди Макрон Х ижтимоий тармоғидаги саҳифасида.

Ҳозирда Дамашқдаги портлашлар юзасидан текширув ишлари давом этмоқда.

Эслатиб ўтамиз, аввалроқ Эммануэль Макрон Сурияга ташриф буюргани ҳақида хабар берилган эди.