Хитой биринчи марта CERES-2 ракета ташувчисини муваффақиятли учирди

Хитойнинг Galactic Energy компанияси ўз ишланмаси бўлган янги CERES-2 ракета ташувчисининг биринчи муваффақиятли парвозини амалга оширди. Бу ҳақда “Синьхуа” хабар берди.

Қайд этилишича, Хитой бугун, 7 ноябрь куни тўртта сунъий йўлдош ортилган CERES-2 Y3 ракета-ташувчисини учирган.

Ракета ташувчининг парвози Пекин вақти билан соат 7:37 да Хитойнинг шимоли-ғарбидаги Цзюцюань космодромида старт олган ва сунъий йўлдошларни 535 км баландликдаги қуёш-синхрон орбитага олиб чиққан.

Шу тариқа, ушбу парвоз CERES-2 ракета ташувчисининг биринчи муваффақиятли миссияси бўлган.

Маълумот учун, CERES-2 тижорий парвозлар бозори эҳтиёжлари учун ишлаб чиқарилган ўрта ҳажмли ракета ташувчи ҳисобланади. CERES сериясининг такомиллаштирилган модели бўлган мазкур ракета ташувчи кетма-кет уланган учта қаттиқ ёқилғили босқич ва суюқ ёқилғили юқори блок конфигурациясига эга. Ракетанинг старт оғирлиги тахминан 100 тоннани, 500 км баландликдаги қуёш-синхрон орбитага чиқаришдаги юк кўтариш қобилияти эса 1,3 тоннани ташкил этади. Бунда ушбу ракета ташувчи ҳам қуруқликдан, ҳам денгиздан парвознинг турли усулларини қўллаб-қувватлайди. 

Эслатиб ўтамиз, ракетанинг жорий йил 17 январь куни бўлиб ўтган биринчи парвози муваффақиятсизлик билан якунланган эди.