Қозоғистонда ўзбекистонлик 19 ёшли келин фожиали ҳалок бўлди

Қозоғистоннинг Жамбил вилоятида 19 ёшли Ўзбекистон фуқароси Мадина ширинлик сабабли эри билан юзага келган жанжалдан сўнг вафот этди. Бу ҳақда “Qumash.kz“ хабар берди.

Қайд этилишича, қиз ўлимидан бир кун аввал дугонасига эри уни калтаклагани ва уйдан кетмоқчи эканини айтган. Мадина Мерке туманида вафот этган. Полиция ҳолат юзасидан ўз жонига қасд қилишга олиб бориш моддаси билан судгача тергов бошлаган.

Марҳуманинг дугонасининг айтишича, Мадина эри билан тез-тез келишмовчиликка бориб турган ва эркак унга нисбатан жисмоний куч ишлатгани ҳақида бир неча бор шикоят қилган. Унинг сўнгги жанжали саккиз ойлик фарзанди учун олиб келинган “Барни” бисквити туфайли юзага келган. Дугонасининг сўзларига кўра, эри боласи учун олиб келган бисквитдан Мадина 1 дона еган. Шундан кейин эркак қизни урган.

Эртаси куни Мадина дугонасига йиғиб қўйган буюмларининг суратини юбориб, эри билан яшамаслигини билдирган ва кетмоқчи эканини айтган. Шунингдек, ундан 15 минг тенге сўраган. Бироқ керакли маблағ ўша пайтда топилмаган. Шундан сўнг, Мадина билан алоқа узилган. Кейинроқ унинг қайнонаси дугонасига қизнинг вафот этганини айтган.

Маълум бўлишича, Мадина Ўзбекистон фуқароси, унинг эри эса Қозоғистон фуқароси бўлган. Улар қарийб икки йил давомида турмуш қуриб, бирга яшаган ва саккиз ойлик фарзандни тарбиялаган. Дугонасининг айтишича, Мадина ҳомиладор ҳам бўлган бўлиши мумкин.

Марҳуманинг дугонаси Threads’даги саҳифасида унинг ўлими ҳолатига шубҳа билдирган. У воқеани тўлиқ тергов қилишга чақирган ва қизнинг танасида жароҳат излари бўлганини айтган. Бироқ бу маълумотлар ҳозирча расман тасдиқланмаган.

Жамбил вилояти полицияси зарур тергов ҳаракатлари олиб борилаётганини билдирган. Идора тергов якунлангунига қадар ўлим сабаблари ва муайян шахсларнинг айбдорлиги юзасидан хулоса бермаган.

Марҳуманинг қариндошлари ва яқинлари унинг ўлими билан боғлиқ барча ҳолатлар синчковлик билан аниқланишини талаб қилмоқда.

Эслатиб ўтамиз, аввалроқ Туркияда 29 ёшли ўзбекистонлик аёл ўз жонига қасд қилиб, вафот этганди.