Қирғизистонда жасадларни куйдириш тақиқланди

Қирғизистонда марҳумларнинг жасадларини кремация қилиш (куйдириш) тақиқланди. Бу ҳақда мамлакат Президенти Садир Жапаров имзолаган “Дафн этиш ва дафн ишлари тўғрисида”ги қонунга ўзгартиришлар киритиш ҳақидаги қонунда сўз боради.

Ҳужжат Жогорку Кенеш томонидан 2026 йил 25 июнда қабул қилинган. Дастлаб қонун лойиҳаси концепциясида Қирғизистонда крематорийлар ташкил этишга рухсат берувчи қонуннинг 24-моддаси амал қилишини тўхтатиб туриш кўзда тутилган. Ушбу норманинг амал қилишини 2040 йил 1 январгача тўхтатиб туриш режалаштирилган.

Киритилган ўзгартиришларга кўра, қонундан кул солинган кўзаларни кўмишга оид қоидалар чиқариб ташланган, шунингдек, марҳумларни дафн этиш усули сифатида кремация қилиш ҳақидаги алоҳида нормалар ўз кучини йўқотган деб топилган.

Янги таҳрирда “кремация” тушунчаси санитария мақсадларида махсус техник иншоотларда тиббий фаолият натижасида ҳосил бўладиган биологик объектларни оловга қўйиш (куйдириш) деб белгиланган. Бунда крематорий ушбу турдаги объектларни санитария жиҳатидан термик йўқ қилиш учун мўлжалланган иншоот сифатида қаралади.

Шунингдек, шахси аниқланмаган ва талаб қилиб олинмаган мурдаларни, шунингдек, аборт қилинган ва ўлик туғилган ҳомилаларни кўмиш тартибига аниқлик киритилган. Улар ички ишлар органларининг розилиги билан қабристонларнинг махсус ажратилган участкаларида дафн этиш хизмати бўйича ихтисослаштирилган хизмат томонидан ерга кўмилади.

Қонуннинг алоҳида моддаси эндиликда крематорийларни ташкил этиш ва улардан фойдаланишни тартибга солади. Ҳужжатда кўрсатилишича, бундай иншоотлар тиббий фаолият натижасида ҳосил бўлган биологик объектларни термик йўқ қилиш учун мўлжалланган. Бунда крематорийлардан вафот этган одамларнинг таналарини, аборт қилинган ёки ўлик туғилган ҳомилаларни куйдириш учун фойдаланиш тақиқланади.

Ихтисослаштирилган иншоотлар республика ва маҳаллий бюджетлар, шунингдек, хўжалик юритувчи субъектлар маблағлари ҳисобидан ташкил этилиши мумкин.

Қонун расмий эълон қилинганидан 10 кун ўтгач кучга киради. Вазирлар Маҳкамасига ўз норматив-ҳуқуқий ҳужжатларини ушбу ҳужжатга мувофиқлаштириш топширилган.

Эслатиб ўтамиз, аввалроқ жорий йил апрель ойининг охирида Қозоғистон ва Марказий Осиёдаги биринчи крематорий иш бошлагани, бироқ кремация учун ариза топшириш жараёни ҳалигача тартибга солинмагани ҳақида хабар берилган эди.