Қирғин остидаги “Love story”. Украинада жуфтлик фронт яқинида турмуш қурди (фоторепортаж)

Украинанинг Россия билан урушдаги фронт чизиғи яқинлашиб келаётган Краматорск шаҳрида 35 ёшли Тетяна ва Александр никоҳдан ўтди. Бу ҳақда “The Guardian” хабар берди.

Қайд этилишича, Украинанинг Мустақиллик куни – мамлакат мустақиллигининг 35 йиллиги нишонланган 29 августда жуфтлик шаҳар марказидаги Тинчлик майдонида тўй маросимини ўтказган. Маросим ҳаво ҳужумлари ва дронлар хавфи юқори бўлган шароитда, дронларга қарши ҳимоя тўрлари остида бўлиб ўтди.

Краматорск тўйдан 3 кун олдин расман жанговар ҳудуд таркибига киритилган. Россия қўшинлари Донецк вилоятида Украина назоратида қолган ҳудудларга яқинлашар экан, шаҳар тобора кўпроқ ҳужумларга дуч келмоқда. Нашр маълумотига кўра, никоҳдан олдинги бир неча кун ичида шаҳарда 51 та ўққа тутиш ҳолати қайд этилган ва 6 киши ҳалок бўлган.

Шаҳарда кўплаб бинолар зарарланган, деразалар ўрнини фанералар эгаллаган, одамлар ва очиқ бизнеслар сони кескин камайган. Кўчаларнинг айрим қисмлари дронларга қарши тўрлар билан ёпилган, шаҳар атрофида эса танкларга қарши бетон тўсиқлар ўрнатилган.

Шунга қарамай, Тетяна ва Александр никоҳни айнан Краматорскда ўтказишга қарор қилган. Александрнинг айтишича, бу қарор шаҳар ва Донецк вилояти хотирасини сақлаб қолиш истаги билан боғлиқ. Унинг таъкидлашича, урушда бир неча йил аввал борган кўплаб шаҳар ва қишлоқлар ҳозир вайроналарга айланган.

Александр Мариуполь шаҳрида туғилган бўлиб, шаҳар урушнинг дастлабки босқичида узоқ давом этган қамалдан сўнг Россия назоратига ўтган. Тетяна эса болалигида ҳар йили ёзни ҳозир Россия босиб олган Донецк ҳудудидаги бувисининг уйида ўтказган.

Маълум қилинишича, Тетяна фронтда кўнгилли ҳарбий тиббиёт ходими сифатида ишлайди. У Краматорскда хизмат қилган, аммо тўйдан бир неча кун олдин унинг тиббий эвакуация гуруҳи Киевга қайта жўнатилган. Шунга қарамай, у маросимда иштирок этиш учун шарқий Украинага қайтиб келган.

Жуфтлик шу йил февраль ойида танишган. Тетяна Александрга интернет орқали мурожаат қилиб, унга тиббий ёрдам кўрсатишни таклиф қилган. Уларнинг иккаласи ҳам уруш шароитида яшаган ва ишлагани улар ўртасидаги муносабатни янада яқинлаштирган.

Никоҳ маросими онлайн тарзда ўтказилган. Украина 2024 йилда уруш туфайли жисмонан бир жойда бўла олмайдиган жуфтликлар учун онлайн никоҳ хизматини жорий қилган. Мамлакат Адлия вазирлиги маълумотларига кўра, йилнинг биринчи ярмида никоҳларнинг 38 фоизи онлайн тарзда қайд этилган.

Билдирилишича, никоҳ узуклари тақилиб, қасамёдлар айтилган ва жуфтлик бир-бирини ўпган. Маросимдан кейин улар яқин атрофдаги кам сонли очиқ муассасалардан бири бўлган қаҳвахонага бориб, тўй тортини тановул қилган.

Қайд этилишича, тўй пайтида шаҳар устида дрон пайдо бўлгани ҳақида хабар берилгани сабабли қисқа муддат хавотирли вазият юзага келган. Бироқ жуфтлик маросимни давом эттирган.

Тетяна уруш даврида оила қуришни келажакка умид билан боғлаган. Унинг айтишича, Россия Украинада қўрқув ва тушкунлик муҳитини яратишга ҳаракат қилаётган бир пайтда янги ва гўзал нарса барпо этиш, бир-бирига ғамхўрлик қилиш ва севиш муҳим.

Тетяна ва Александрнинг ёши ҳам Украина мустақиллиги ёшига тенг – иккаласи ҳам 35 ёшда. Улар мамлакатдаги даҳшатли ва эртанги кунни мавҳумликка ботираётган, қанчадан-қанча болалар ва тинч инсонларни бошини еяётган урушга қарамай, фарзандли бўлиш ва келажак қуришни режалаштирмоқда.