“Иззат Назарбек” номини олган “кўча” икки тўппонча билан қўлга тушди (видео)

Тошкентда фуқарони ўлдираман деб қўрқитиб, ундан 70 минг АҚШ доллари ундирган шахс қўлга олинди. Уни қўлга олиш вақтида мазкур шахс томонидан сақлаб келинган 2 дона тўппонча, ўқ-дорилар ва пичоқлар ҳам топилган. Бу ҳақда Тошкент шаҳар Ички ишлар бош бошқармаси хабар берди.

Маълум қилинишича, ҳуқуқни муҳофаза қилувчи органларга 2 нафар фуқаро мурожаат қилиб, ўзини Иззат деб таништирган шахс ва унинг шериклари томонидан қўрқитиш ва босим ўтказиш орқали катта миқдорда пул маблағлари ундирилганини билдирган.

Мурожаатчилардан бирининг айтишича, у 2019 йилда Иззат исмли шахс билан ҳамкорлик қила бошлаган. Кейинчалик гумонланувчи ундан кўпроқ пул талаб қилиб, ўлдириш билан таҳдид қилган. Бу ҳолат 2-3 йил давом этган.

Яна бир мурожаатчи эса гумонланувчи ундан турли вақтларда 3-4 минг ва 5 минг доллардан пул олиб кетганини айтган. Унинг сўзларига кўра, мебель тайёрлаш билан боғлиқ можародан кейин ҳам унга босим ўтказилган.

“Умумий ҳисобда жами 70 минг АҚШ долларини мендан тазйиқ қилиб, куч ишлатиб олди. Бермайман десам, урарди”, деган мурожаатчи.

Биринчи мурожаатчи BMW X5 русумли автомобиль учун 30 минг доллар, ошхона мебели учун эса 15 минг доллар беришга мажбур қилинган. Ундан умумий ҳисобда 70 минг доллар маблағ олингани айтилган.

Иккинчи мурожаатчи эса бизнесга мажбуран шерик қилингани, Туркияда жиноят олами вакили билан учраштирилгани ва унга нисбатан зўравонлик ишлатилганини билдирган. У қўрқитиш орқали автомобиль сотиб олишга ҳамда 38 минг доллар беришга мажбур қилинган.

Терговга қадар текширув давомида яна бир аёл ҳам ҳуқуқни муҳофаза қилувчи органларга мурожаат қилган. У гумонланувчи шахсий суратларини тарқатиш билан қўрқитиб, учрашиш ва жинсий алоқа қилишга мажбурлаганини билдирган.

“Ўша шахсий расмларни тарқатиш билан қўрқитди. Кейин Instagram’га чиқазиб юбораман, шарманда қиламан деди. Кўришганимизда ҳам зўравонлик қилди, тазйиқ ўтказди”, деган аёл.

Тезкор тадбирлар давомида гумонланувчининг шахси аниқланган. Тергов маълумотларига кўра, у 1988 йилда туғилган Исоқ исмли шахс бўлиб, “Иззат Назарбек” лақаби билан танилган. У Учтепа туманидаги спорт залларидан бирида қўлга олинган.

Қўлга олишдан сўнг ўтказилган кўздан кечиришда гумонланувчига тегишли “Байкал” номли 2 дона тўппонча, уларга тегишли ўқ-дорилар, пичоқлар ҳамда тўппонча ғилофи аниқланиб, процессуал тартибда олинган.

Ҳозирда мазкур ҳолат юзасидан Жиноят кодексининг 165-моддаси (Товламачилик) учинчи қисми “а” банди ҳамда 121-моддаси (Шахсни жинсий алоқа қилишга мажбур этиш) тўртинчи қисми “в” банди билан жиноят иши қўзғатилган. Гумонланувчига нисбатан эса қамоққа олиш тарзидаги эҳтиёт чораси қўлланилган.

Эслатиб ўтамиз, аввалроқ Фарғона вилоятида “Мансур Казанский” лақаби билан танилган шахс 100 минг АҚШ долларини товламачилик йўли билан олаётган вақтида қўлга олингани ҳақида хабар берилган эди.