Испанияда Тебасга қарши иш қўзғатилди

Испания Олий спорт кенгаши (CSD) Ла Лига президенти Хавьер Тебаснинг “Реал Мадрид” ҳақидаги баёнотларига ҳуқуқий баҳо бериш учун масалани Спорт маъмурий трибуналига (TAD) юборди. Бу ҳақда AS нашри хабар берди.

Манбага кўра, эҳтимолий сценарийлардан бири сифатида Тебаснинг ўз лавозимидан четлатилиши ҳам кўриб чиқилиши мумкин.

Можаро жорий йилнинг 20 сентябрь куни “Реал Мадрид”нинг Ла Лига доирасида “Атлетико Мадрид”га 1:2 ҳисобида мағлуб бўлган учрашувидан кейин бошланган. Ўйиндан сўнг “Реал” бош мураббийи Жозе Моуриньо бош ҳакам Ортис Ариаснинг “Атлетико” футболчилари Ли Кан Ин ва Кристиан Ромерога қизил карточка кўрсатмаганидан норозилик билдирган.

Шундан сўнг Хавьер Тебас “Реал Мадрид” ва клубнинг расмий телеканали – “Real Madrid TV”ни ҳакамларга босим ўтказишда айблади. У ҳатто телеканал фаолиятини нацистлар Германияси тарғибот вазири Йозеф Геббельснинг тарғибот услублари билан таққослади. Бу баёнотдан кейин “Реал Мадрид” Тебаснинг сўзларини кескин қоралаб, Ла Лига раҳбариятини ўзгартиришга чақирган.

Маълумот учун, 64 ёшли Хавьер Тебас 2013 йилдан буён Ла Лига президенти лавозимида ишлаб келмоқда. У 2023 йил декабрь ойида 2027 йилгача мўлжалланган тўртинчи муддатга қайта сайланган.