“Ишонмагин дўстингга…” Трамп Зеленскийнинг ўрнига бошқа раҳбар сайлаш кераклигини айтди

АҚШ Президенти Дональд Трамп Украина Президенти Владимир Зеленский ўрнига янги раҳбар сайлаш вақти келганини айтди. У Зеленскийни Россиянинг нефтьни қайта ишлаш заводларига ҳужум қилиш орқали жаҳон бозорида дизель ёнилғиси таъминотига зарар етказаётганликда айблади. Бу баёнот Трамп Россия Президенти Владимир Путин билан дизель ёнилғиси етказиб бериш бўйича келишувга эришганини эълон қилганидан бир кун ўтиб янгради. Бу ҳақда “Reuters” хабар берди.

Трамп кеча, 10 октябрь куни Оқ уйда журналистлар билан суҳбатда Украина раҳбариятини кескин танқид қилган. Унинг айтишича, Зеленский урушни тугатиш бўйича келишувга эришиш имкониятига эга бўлган, бироқ бундан фойдаланмаган.

“Менимча, Украина учун янги Президент сайлаш вақти келди”, деган Трамп.

У Зеленскийни Россиянинг нефтьни қайта ишлаш заводларига ҳужум қилиш орқали жаҳон бозорида дизель ёнилғиси таъминотига муаммо туғдираётганликда айблаган. Трампнинг таъкидлашича, Россия дунёдаги дизель ёнилғиси таъминотининг катта қисмини таъминлайди. Шу сабабли Украинадаги ҳужумлар ёнилғи етказиб беришга, жумладан, АҚШдаги фермерлар ва чорвадорларга ҳам таъсир қилиши мумкин.

“Мен унга: “Хоҳлаганингни қил. Фақат нефтьни қайта ишлаш заводларига зарба берма. Нишонлар етарли. Заводларга ҳужум қилма“, дедим. Лекин у бориб, яна зарба берди. У буни бас қилгани маъқул”, деган АҚШ Президенти.

Трамп Зеленский ўрнига келадиган янги раҳбар Россия билан келишувга эриша олиши кераклигини таъкидлаган.

“Менимча, улар келишувга эриша оладиган янги раҳбар сайлашлари керак. Чунки у кўплаб келишувларга эришиши мумкин эди, аммо негадир буни ҳеч қачон қилмайди”, деган у.

Зеленский эса Трампнинг Россия билан дизель ёнилғиси бўйича келишувини танқид қилган. Унинг фикрича, санкцияларнинг юмшатилиши Россияни урушни давом эттиришга ундаши мумкин.

Эслатиб ўтамиз, Россия ҳукумати кеча, 10 октябрь куни дизель ёнилғиси экспортига қўйилган тақиқ қисман бекор қилинганини маълум қилган эди. Трампнинг Путин билан келишуви ҳам айнан дизель ёнилғиси етказиб бериш ва унга қўйилган чекловларни юмшатиш билан боғлиқ. Шунингдек, Зеленский ушбу келишувни кескин қоралаб, “очиқ заифлик белгиси” деб атаган эди.