Кутилмаган келишув: Россия АҚШга йирик миқдорда дизель сотади

Россия Президенти Владимир Путин ва АҚШ Президенти Дональд Трамп телефон орқали мулоқот ўтказиб, Украина ва Эрондаги низони бартараф этиш ва иқтисодий ҳамкорлик масалаларини муҳокама қилди. Бу ҳақда Кремль хабар берди.

“Шунингдек, Эрон атрофидаги вазият ва икки томонлама муносабатларнинг турли жиҳатларига тўхталиб ўтилди”, дейилади Кремль эълон қилган баёнотда.

Президент идорасига кўра, Россия томони Америка ва жаҳон бозорларига нефть ва нефть маҳсулотлари етказиб беришга тайёрлигини тасдиқлаган. Давлат раҳбарлари, шунингдек, шахсий алоқаларни ҳамда Президент администрациялари, махсус хизматлар ва бошқа идоралар йўналиши бўйича ҳамкорликни давом эттириш тўғрисидаги келишувни тасдиқлаган.

Ўз навбатида, Трамп энергетика соҳасидаги кенг кўламли келишув ҳақида эълон қилган. Унинг сўзларига кўра, Россия ўз нефтни қайта ишлаш заводларининг ҳолатига қараб, энг қисқа муддатда АҚШ ва жаҳон бозорига 3 миллион тоннагача дизель ёқилғиси етказиб беради. Бунда Москва 300 минг тоннани ҳозирданоқ, 500 минг тоннани ноябрь ойида ва яна бир миллион тоннани ундан кейин дарҳол етказиб беришга тайёр. Ушбу маълумотни кейинчалик журналистларга Бош вазир ўринбосари Александр Новак ҳам тасдиқлаган.

АҚШ Молия вазирлиги эса Ташқи активларни назорат қилиш бошқармаси (OFAC) бундай етказиб беришларга рухсат берувчи вақтинчалик бош лицензияни дарҳол чиқаришини маълум қилган. Шу тариқа, Россиянинг дизель ёқилғисини сотиш, етказиб бериш, тушириш ва импорт қилиш, жумладан, Қўшма Штатларга олиб кириш билан боғлиқ сипориш ва операцияларга 7 апрелгача рухсат берилади.

Эслатиб ўтамиз, аввалроқ АҚШ ва Россия “Лукойл” компанияси активлари иштирокида кўп миллиард долларлик нефть битимини муҳокама қилаётгани ҳақида хабар берилган эди.