Instagram 10 йилдан сўнг логотипини янгилади

Instagram 10 йил ичида илк бор ўзининг “Instagram” номи ёзилган логотипини янгилади. Компания бу орқали платформанинг визуал кўринишини янада замонавийлаштиришни мақсад қилган. Бу ҳақда Instagram раҳбари Адам Моссери маълум қилди.

Унинг сўзларига кўра, янги wordmark “янада ўткирроқ ва замонавийроқ” кўринишга эга бўлиб, унда компаниянинг дастлабки дизайнига хос жиҳатлар ҳамда соддалик сақлаб қолинган.

Янгиланган логотипда “s”, “r” ва “g” ҳарфлари қўлёзмага ўхшаш, эгри шаклларда ишлаб чиқилган. Бироқ янги дизайн фойдаланувчилар томонидан турлича кутиб олинди.

Айримлар унинг замонавий кўриниши ва шрифт танловини маъқуллаган бўлса, бошқалар айрим ҳарфларнинг шаклини танқид қилган. Ҳатто баъзи фойдаланувчилар янги ёзув ҳазил тариқасида “Instagzam”га ўхшаб қолганини таъкидлаган.

Янги wordmark атрофидаги ҳазиллар орасида ChatGPT’нинг Instagram’даги пости ҳам эътиборни тортди. Компания янги шрифт услубига тақлид қилиб, ўз номини “chatjipiti” кўринишида ёзди ва постга “no notes” (“гап йўқ”) деган изоҳни қолдирди.

Instagram охирги марта 2016 йилда катта дизайн ўзгаришини амалга оширган эди. Ўшанда компания ўзининг классик жигарранг камера тасвиридан воз кечиб, ҳозиргача қўлланиб келаётган пушти ва бошқа ёрқин ранглардан иборат градиентли иконка дизайнига ўтган. Шу билан бирга, илованинг фойдаланувчи интерфейси ҳам қайта ишланган.

Таъкидланишича, ҳозирча компаниянинг илова иконкасини ҳам ўзгартириши ёки бошқа дизайн янгиликларини жорий этиши ҳақида расмий маълумот берилмаган.