Инфантинонинг маслаҳатчиси FIFA сиёсатига норозилик сифатида истеъфога чиқди

FIFA президенти Жанни Инфантинонинг катта маслаҳатчиси Карлос Кордейро ташкилотнинг Жаҳон чемпионати тижорат ҳуқуқларидаги ўз улушини хусусий инвесторларга сотиш режасига норозилик сифатида лавозимини тарк этди. Бу ҳақда “Sky News” хабар берди.

Карлос Кордейро АҚШ футбол федерациясининг собиқ президенти ҳамда Goldman Sachs компаниясининг собиқ вице-раиси ҳисобланади. У FIFA президентининг катта маслаҳатчиси сифатида 2021 йилдан буён фаолият юритиб келаётган эди.

“FIFA президентининг катта маслаҳатчиси, собиқ банкир ва футболга чин дилдан ошно инсон сифатида ташкилот Жаҳон чемпионати ҳуқуқларидаги улушини сотишни кўриб чиқаётган бир пайтда бефарқ қололмайман. Аниқ айтаман: мен ушбу таклифни тайёрлашда иштирок этмаганман ва унга қатъий қаршиман. Бу FIFA’га аъзо ассоциациялар учун ҳам, футбол учун ҳам, ўйиннинг узоқ муддатли келажаги учун ҳам ёмон келишувдир”, дейди Кордейро.

Унинг таъкидлашича, FIFA’нинг асосий вазифаси ҳар қандай нарх эвазига тижорат даромадини максимал даражага етказиш эмас, балки келажак авлодлар учун футболни ҳимоя қилиш ва янада ривожлантиришдан иборат.

“Беш йилдан ортиқ вақт давомида FIFA’да хизмат қилиш ва футбол тақдирига бефарқ бўлмаган, принципларга содиқ инсонлар билан елкама-елка ишлаш мен учун катта шараф бўлди. Умид қиламанки, улар ҳам ўз фикрларини очиқ айтади. Чунки бундай муҳим қарорлар футболдан даромад оладиганлар эмас, балки унинг манфаатларини биринчи ўринга қўядиганлар томонидан қабул қилиниши лозим”, дейди Кордейро.

Эслатиб ўтамиз, FIFA Жаҳон чемпионати тижорат ҳуқуқларидаги ўз улушининг бир қисмини сотиш режасидан кейин UEFA’га аъзо миллий ассоциациялар FIFA’нинг баҳсли режаларига қарши чиқиб, ушбу ташаббус бекор қилинмагунча ташкилотнинг барча мусобақаларини бойкот қилишини эълон қилди.