Германияда Гитлернинг “Бургут уяси” ёниб, кул бўлди (видео)

Германиянинг Бавария Альп тоғларида Адольф Гитлер учун қурилган “Бургут уяси” номи билан танилган тарихий бино ёнғинда деярли бутунлай вайрон бўлди. Бу ҳақда “Associated Press” хабар берди.

Қайд этилишича, ёнғин кеча, 23 октябрь куни Германиянинг жануби-шарқидаги Берхтесгаден туманида жойлашган бинода юз берган. Ёнғин сигнализацияси 23 октябрь куни тахминан соат 21:15 да ишга тушган. Воқеа жойига етиб борган ўт ўчирувчилар денгиз сатҳидан 1834 метр баландликда жойлашган бинога яқинлашганида алангани кўрган.

Ҳудуднинг мураккаб рельефи сабабли ўт ўчириш машиналарини воқеа жойига олиб бориш қийин бўлган. Полиция маълумотига кўра, бино ва унинг атрофидаги ҳудудга фақат нафас олишни ҳимоя қилувчи махсус воситалар билан кириш мумкин бўлган. Шу сабабли ёнғинни ўчириш ишлари мураккаб кечган.

Маҳаллий туризм бошқармаси дастлаб бинодаги айрим қисмларни сақлаб қолиш мумкин ёки мумкин эмаслиги номаълумлигини билдирган. Кейинчалик полиция бино деярли бутунлай ёниб кетганини маълум қилган. Ўт ўчирувчилар бино ичидан ҳеч кимни топмаган, расмийлар ҳозирча ҳодисада ҳеч ким жабрланмаган деб ҳисобламоқда.

Полиция ёнғин бошланганидан кўп ўтмай терговчилар эътиборига тушган шахс ҳибсга олинганини билдирган. Бироқ унинг ёнғинни келтириб чиқаришга алоқаси бор-йўқлиги ҳозирча аниқланмаган.

Маълумот учун, Kehlsteinhaus номи билан ҳам танилган “Бургут уяси” 1938 йилда қуриб битказилган. Бинога тоғ йўли орқали, сўнг бир нечта туннель ва қоя ичида жойлашган лифт ёрдамида етиб бориш мумкин. Йўл оддий транспорт воситалари учун ёпиқ бўлиб, ундан сайёҳлик автобуслари фойдаланади.

Мазкур бино 1952 йилдан буён кафе ва ресторан сифатида фаолият юритиб келган. Шунингдек, унда маскан тарихига бағишланган кўргазма ҳам мавжуд. Ёнғин содир бўлишидан олдин бино 23 октябрь куни ташриф буюрувчилар учун очиқ бўлмаган.

Эслатиб ўтамиз, аввалроқ Франция пойтахти Парижда 1615 йилда ташкил этилган тарихий озиқ-овқат бозори кучли ёнғин оқибатида бутунлай вайрон бўлган эди.