Ғарбий Европада 27 йилда илк бор тўлиқ қуёш тутилди (фоторепортаж)

Испаниянинг шимолий ҳудудларида кеча, 12 август куни камёб астрономик ҳодиса яъни тўлиқ қуёш тутилиши кузатилди. Ҳодисани кўриш учун мамлакатнинг турли ҳудудларига миллионлаб сайёҳ ва маҳаллий аҳоли йиғилди. Бу ҳақда “Reuters” хабар берди.

Нашрнинг ёзишича, қуёш тутилиши вақтида Ой Қуёшни тўлиқ тўсган ҳамда айрим ҳудудлар қисқа муддатга қоронғиликка чўккан. Мадрид шимолидаги Буитраго де Лозоя ҳудудида тутилиш маҳаллий вақт билан соат 20:30 дан кейин кузатилган ва тўлиқ қоронғилик бир дақиқага яқин давом этган.

Гувоҳларнинг сўзларига кўра, ҳодиса вақтида осмон қоронғилашиб, Қуёш яна кўрина бошлаганида ранглар аста-секин қайтган. Айрим кузатувчилар бу манзарани илмий-фантастик фильмга ўхшатган.

Испания расмийлари тутилиш йўналишидаги ҳудудларга 6 миллионгача кузатувчи келишини кутган. Шу сабабли хавфсизлик чораларига алоҳида эътибор қаратилиб, 25 минг нафар полициячи жалб этилган. Шунингдек, қарийб 100 та самолёт ва вертолёт навбатчиликка қўйилган.

Ҳодиса ўрмон ёнғинлари хавфи юқори бўлган даврга тўғри келган. Валенсия минтақасидаги Пенискола шаҳри яқинида қуёш тутилишини томоша қилиш учун ташкил этилган жой атрофида ёнғин чиққан. Ёнғин автомобилдан бошланиб, яна 33 та транспорт воситасига тарқалган, бироқ фавқулодда хизматлар томонидан назоратга олинган.

Шунингдек, тўлиқ қуёш тутилиши Исландияда ҳам кузатилган. Мамлакатга 80 минг нафаргача сайёҳ ташриф буюрган. Рейкьявикда эса тутилишни хавфсиз кузатиш учун мўлжалланган махсус кўзойнаклар бир неча кун олдин сотиб бўлинган.

Эслатиб ўтамиз, аввалроқ дунёдаги энг кучли қуёш телескопи ёрдамида олимлар Қуёш юзасини мисли кўрилмаган даражада юқори аниқликда тасвирга олишгани ҳақида хабар берилган эди.