Францияда яна оммавий намойишлар бошланди: 1,6 млн киши иш ташлади (видео)

Кеча, 5 ноябрь куни Францияда яшаш харажатларининг ошишига қарши чиққан касаба уюшмаларининг оммавий иш ташлаши бўлиб ўтди. Умуммиллий акция иштирокчилари иш ҳақини оширишни, давлат хизматлари фаолиятини, жумладан, таълим соҳасидаги шароитларни яхшилашни талаб қилди, шунингдек, мактаб ўқувчилари ва талабаларнинг норозиликларини қўллаб-қувватлади. Бу ҳақда Энг йирик касаба уюшмаси ва акциянинг расмий ташкилотчиси – CGT хабар берди.

CGT маълумотларига кўра, бутун мамлакат бўйлаб иш ташлашда тахминан 1,6 миллион киши иштирок этган. Парижда норозилик намойишларига 350 минг киши чиққан.

Франция ИИВ маълумотларига кўра, соат 17:00 ҳолатида бутун Франция бўйлаб, шу жумладан Парижда ўтказилган намойишларда 600 мингга яқин киши иштирок этган. Мамлакат бўйлаб жами 180 га яқин митинг бўлиб ўтган.

BFM TV’нинг хабар қилишича, бу жорий кузнинг энг оммавий акцияси бўлган.

ИИВ, шунингдек, Ренн, Тулуза, Бордо, Страсбург ва Париждаги норозилик намойишлари чоғида бир нечта зўравонлик ва зарар етказиш ҳолатлари қайд этилганини маълум қилган. Бироқ Франция ОАВ хабарларидан кўринишича, акциялар асосан тинч ўтган. Бутун мамлакат бўйлаб ўтказилган акцияларда тартибни 70 минг полициячи назорат қилган.

Эслатиб ўтамиз, сентябрь ойи охиридан бери Франция кўлами бўйича мисли кўрилмаган кўча норозиликлари тўлқинини бошдан кечирмоқда. Таълим тизимидаги камчиликлар ва яшаш харажатларининг ошишига қарши чиққан мактаб ўқувчилари ва талабаларнинг акцияларига мамлакатнинг бошқа аҳолиси ҳам қўшилган. 17-18 октябрь кунги норозилик намойишлари тартибсизликлар ва полиция билан тўқнашувлар билан кечди. Норозиликлар фонида Францияда сиёсий инқироз кескинлашди.