Францияда кучли торнадо: юзлаб уйлар вайрон бўлди, аҳоли эвакуация қилинди (фоторепортаж)

Франциянинг жануби-ғарбий қисмидаги Помас қишлоғида кучли торнадо юзлаб уйларни вайрон қилди. Қишлоқдаги 500 та уйнинг қарийб 300 таси зарар кўрган, шулардан 100 таси яшаш учун хавфли ҳолга келган. Бу ҳақда “Reuters” хабар берди.

Торнадо жорий йилнинг 24 август куни кечқурун Од ҳудудида содир бўлган. Табиий офат оқибатида ўнлаб одам жароҳатланган, бироқ жабрланганларнинг ҳеч бири оғир аҳволда эмас.

“Апокалипсисга ўхшарди”, дея воқеани тасвирлаган 41 ёшли Ванесса торнадо вақтида уйида қолиб кетганини айтди. Унинг сўзларига кўра, шамол шу қадар кучли бўлганки, деразаларни ёпишнинг иложи бўлмаган.

“Биз бу охири бўлади, деб ўйладик. Торнадо тўғри биз томон келаётганини кўрдик”, деди у.

Табиий офатдан сўнг Помаснинг барча аҳолиси эвакуация қилинган. Мутахассислар биноларнинг хавфсизлигини текширмоқда.

Қишлоқда айрим уйлар бутунлай қулаган, бошқаларининг томлари учиб кетган ёки деворларининг бир қисми вайрон бўлган. Автомобиллар ҳам вайроналар остида қолган.

Метео-Франс мутахассиси Франсуа Жобарднинг айтишича, Помасдаги торнадо ниҳоятда кучли бўлган ва шамол тезлиги соатига 200 километр ёки ундан юқорига етган бўлиши мумкин.

Францияда йилига бир неча ўнлаб торнадо кузатилади. Бироқ улар одатда АҚШдагидек кучли бўлмайди. Шу сабабли Помасдаги вайронагарчилик мамлакат учун кам учрайдиган ва жиддий табиий офат сифатида баҳоланмоқда.

Торнадо Франциянинг жанубида давом этаётган кучли жазирама ортидан момақалдироқли об-ҳаво бошланган пайтда юз берган. Мутахассислар иқлим ўзгариши кучли бўронлар сони ва интенсивлигига таъсир қилаётганини таъкидламоқда, бироқ торнадо ва иқлим ўзгариши ўртасидаги бевосита боғлиқлик бўйича тадқиқотлар ҳали давом этмоқда.

Эслатиб ўтамиз, аввалроқ Хитойнинг Хубэй провинциясида юз берган икки торнадо оқибатида 11 киши ҳалок бўлгани ҳақида хабар берилган эди.