Францияда 400 дан ортиқ одам ўрмонга ўт қўйганликда гумонланмоқда

Францияда ўрмон ёнғинларини келтириб чиқаришда гумон қилинган 420 киши ҳибсга олинган. Бироқ ҳибсга олинганларнинг барчаси ёнғинларни қасддан содир этгани ҳали аниқланмаган. Бу ҳақда BBC хабар берди.

Қайд этилишича, Францияда бу йил Иккинчи жаҳон урушидан бери энг катта талафот келтирган ўрмон ёнғинлари кузатилмоқда. Ёнғинлар оқибатида мамлакатда 300 минг акрдан (121 405 гектар) ортиқ ҳудуд зарар кўрган.

Маълумотларга кўра, 420 киши ёнғинларни қасддан ёки эҳтиётсизлик оқибатида келтириб чиқарганликда гумон қилинмоқда. Уар орасида 166 нафар вояга етмаганлар бор. Айрим ҳолатларда гумонланувчиларга нисбатан қаттиқ чоралар кўрилган.

Масалан, мамлакат жануби-шарқидаги Вар ҳудудида 23 ёшли эркак беш кун давомида 10 та ёнғинни атайлаб ёққанликда гумон қилинмоқда. Агар унинг айби исботланса, у 15 йилгача озодликдан маҳрум қилиниши ва 150 минг еврогача жаримага тортилиши мумкин.

Восгес ҳудудида эса ўрмонда учта ёнғин чиқарганликда айбланган шахс 3 йилга қамалган. Шу билан бирга, айрим адвокатлар ёнғинлар бўйича ҳибсга олишлар сони ҳаддан ташқари кўплигини таъкидламоқда.

Мутахассислар эса ўрмон ёнғинларининг аксарияти қасддан содир этилган, деб ҳисоблайди. Қурилиш ишлари, носоз электр жиҳозлари, сигарет қолдиқлари ва барбекюлар ёнғин келиб чиқишининг асосий сабабларидан бўлиши мумкин.

Шунингдек, Францияда ҳаво ҳароратининг юқорилиги, қурғоқчилик ва кучли шамоллар ёнғинларнинг тез тарқалишига шароит яратмоқда. Мутахассислар иқлим ўзгариши сабаб бундай экстремал ҳодисалар хавфи ортиб бораётганини қайд этмоқда.

Франция Президенти Эммануэль Макрон танқид учун ҳозир вақт эмаслигини таъкидлади.

“Биз иқлим ўзгаришининг янги шароитларига мослашишимиз ва ўрмонларни қайта тиклаш ёндашувимизни ўзгартиришимиз керак. Олинган сабоқларни қайта кўриб чиқиш вақти келади”, деган у.

Эслатиб ўтамиз, аввалроқ Франциянинг жанубидаги Ле Порж қишлоғида юз берган йирик ўрмон ёнғинлари вақтида Иккинчи жаҳон уруши даврига оид 400 га яқин снаряд ва ўқ-дорилар яширилган ҳудуд аниқлангани ҳақида хабар берилган эди.