Францияда 15 ёшгача бўлганлар учун ижтимоий тармоқ тақиқланмайди

Франция Конституциявий кенгаши 15 ёшга тўлмаганлар учун ижтимоий тармоқлардан фойдаланишни тақиқлашни назарда тутган қонун лойиҳасини сўз ва мулоқот эркинлиги ҳамда шахсий ҳаёт дахлсизлигига зид деб топиб, рад этди. Бу ҳақда “Reuters” хабар берди.

Қонун лойиҳаси 1 сентябрдан 15 ёшга тўлмаганларга ижтимоий тармоқларда аккаунт очишни тақиқлаш, аввалдан очилган аккаунтларни эса тўрт ой ичида ёпишни назарда тутган. Платформалардан ёшни текшириш тизимидан фойдаланиш ҳам талаб қилинган.

Бироқ Конституциявий кенгаш қонун лойиҳасида ёшни тасдиқлаш қандай “шартлар ва чегаралар” асосида амалга оширилиши аниқ белгиланмаганини таъкидлаган. Кенгаш ҳужжат сўз ва мулоқот эркинлигини номутаносиб равишда чеклаши ҳамда шахсий ҳаёт дахлсизлигини таъминлаш учун зарур ҳуқуқий кафолатларни назарда тутмаганини қайд этган.

“Кенгаш баҳсли қоидалар, бир томондан, сўз ва мулоқот эркинлигини номутаносиб равишда чеклайди, бошқа томондан эса шахсий ҳаёт дахлсизлиги ҳуқуқини таъминлаш учун зарур бўлган ҳуқуқий кафолатларни назарда тутмайди, деган хулосага келган”, дейилади қарорда.

Франция қонун чиқарувчилари лойиҳани июль ойида маъқуллаган эди. Бу билан Франция Европа давлатлари орасида Австралиядан кейин ёшларни ижтимоий тармоқлардан ҳимоя қилишга қаратилган бундай чекловни жорий этишга уринган биринчи мамлакат бўлган.

Австралия декабрь ойида дунёда биринчи бўлиб 16 ёшга тўлмаганларга Facebook, Snapchat, TikTok ва YouTube каби платформалардан фойдаланишни тақиқлаган. Хитой, Бирлашган Араб Амирликлари ва Туркия каби давлатлар ҳам ёшларнинг ижтимоий тармоқлардан фойдаланишини чеклаш чораларини жорий қилган ёки режалаштирган.

Европа Иттифоқи болаларни ижтимоий тармоқлардаги зарарли функциялардан ҳимоя қилишни кучайтиришни режалаштирмоқда.

Ижтимоий тармоқ компаниялари умумий тақиқларга қарши чиқиб, ёш фойдаланувчиларни ҳимоя қилиш учун ёш чекловлари каби чоралар мавжудлигини таъкидлайди. Google, Meta, Snap ва TikTok муносабат билдириш бўйича сўровларга зудлик билан жавоб бермаган.

Франция Президенти Эммануэль Макрон Бош вазир Себастьян Лекорнюга Конституциявий кенгаш эътирозларини ҳисобга олган ҳолда қонун лойиҳасини қайта ишлашни топширган.

Елисей саройи маълум қилишича, Макрон ислоҳот 2027 йил баҳоригача кучга киришини таъминлашга қатъий бел боғлаган. Ўша даврда Францияда президентлик сайлови ўтказилади, бироқ Макрон учинчи муддатга номзодини қўя олмайди.